ന്യൂഡല്ഹി: കോവിഡ് വ്യാപനം സൃഷ്ടിച്ച സാമ്പത്തിക പ്രതിസന്ധി പരിഹരിക്കുന്നതിന് ഓട്ടോറിക്ഷ, ടാക്സി ഡ്രൈവര്മാര്ക്ക് ധനസഹായം പ്രഖ്യാപിച്ച് ഡല്ഹി മുഖ്യമന്ത്രി അരവിന്ദ് കെജരിവാള്. 5000 രൂപ വീതം സാമ്പത്തിക സഹായം നല്കാനാണ് തീരുമാനിച്ചത്. രണ്ടുമാസത്തേക്ക് റേഷന്കാര്ഡുടമകള്ക്ക് സൗജന്യറേഷന് നല്കാനും തീരുമാനിച്ചതായി അരവിന്ദ് കെജരിവാള് വ്യക്തമാക്കി.
കോവിഡ് വ്യാപനത്തിന്റെ പശ്ചാത്തലത്തില് ഓട്ടോറിക്ഷ, ടാക്സി ഡ്രൈവര്മാര് സാമ്പത്തിക ബുദ്ധിമുട്ട് അനുഭവിക്കുകയാണ്. ഇവര്ക്ക് 5000 രൂപ വീതം നല്കാനാണ് തീരുമാനിച്ചത്. 1,56,000 ഡ്രൈവര്മാര്ക്ക് ഇത് പ്രയോജനം ചെയ്യും. സൗജന്യമായി റേഷന് നല്കാനുള്ള തീരുമാനം വഴി 72ലക്ഷം ജനങ്ങള്ക്ക് ഗുണം ചെയ്യുമെന്നും അരവിന്ദ് കെജരിവാള് പറഞ്ഞു.
സൗജന്യ റേഷന് രണ്ടുമാസം നല്കുന്നു എന്നത് കൊണ്ട് നിയന്ത്രണം രണ്ടുമാസം വരെ തുടരുമെന്ന് അര്ത്ഥമാക്കേണ്ടതില്ല. ഡല്ഹിയില് സ്ഥിതിഗതികള് നിയന്ത്രണവിധേയമായാല് ലോക്ക്ഡൗണ് ആവശ്യമായി വരില്ലെന്നും അദ്ദേഹം പറഞ്ഞു. കഴിഞ്ഞദിവസം ലോക്ക്ഡൗണ് മെയ് പത്തുവരെ ഡല്ഹി സര്ക്കാര് നീട്ടിയിരുന്നു.
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ