മുംബൈ: കിട്ടാക്കടം തിരിച്ചുപിടിക്കുന്നതിനായി വിജയ് മല്യയുടെ സ്വത്തുവകകള്‍ ലേലത്തില്‍ വെച്ച സ്റ്റേറ്റ് ബാങ്ക് ഓഫ് ഇന്ത്യയുടെ നേതൃത്വത്തിലുള്ള ബാങ്കുകളുടെ കൂട്ടായ്മയെ വലച്ചത് മല്യയുടെ കിങ്ഫിഷര്‍ വില്ലയായിരുന്നു. മൂന്നു തവണ ലേലത്തില്‍ വെച്ചിട്ടും കിങ്ഫിഷര്‍ ബംഗ്ലാവ് വാങ്ങിക്കാന്‍ ആരും മുന്നോട്ടുവന്നിരുന്നില്ല. 

എന്നാല്‍ അവസാനം ഫിലിം പ്രൊഡക്ഷന്‍ കമ്പനിയായ വൈക്കിങ് മീഡിയ ആന്‍ഡ് എന്റെര്‍ടെയ്ന്‍മെന്റാണ് ഗോവയിലെ കിങ് ഫിഷര്‍ വില്ല വാങ്ങിയിരിക്കുന്നത്. നടനും ബിസിനസുകാരനുമായ സച്ചിന്‍ ജോഷിയുടെ ഉടമസ്ഥതയിലുള്ള കമ്പനിയാണ് കിങ്ഫിഷര്‍ വില്ല ഏറ്റെടുത്തിരിക്കുന്നത്. 

73 കോടി രൂപയാണ് വില്ലയ്ക്ക് അടിസ്ഥാന വില നിശ്ചയിച്ചിരുന്നത്. ആദ്യ ലേലത്തില്‍ 85.29 കോടി രൂപയായിരുന്നു വില്ലയുടെ അടിസ്ഥാന വില. രണ്ടാം ലേലത്തില്‍ 81 കോടി രൂപയാക്കി വില കുറച്ചു. എന്നിട്ടും രക്ഷയില്ലാതെ 73 കോടി രൂപ വരെയാക്കി അടിസ്ഥാന വില മാറ്റിയിട്ടും ലേലത്തില്‍ വാങ്ങാന്‍ ആളെത്തിയിരുന്നില്ല. സ്റ്റേറ്റ് ബാങ്ക് ഉള്‍പ്പെടെയുള്ള ബാങ്കുകളില്‍ നിന്നാണ് കിങ്ഫിഷര്‍ എയര്‍ലൈന്‍സിന് വേണ്ടി 9000 കോടി രൂപയാണ് മല്യ വായ്പയായി എടുത്തിരുന്നത്.