ന്യൂഡെല്‍ഹി: രണ്ട് ലക്ഷം രൂപയ്ക്കു മുകളിലുള്ള കറന്‍സി ഇടപാടുകള്‍ക്ക് മുന്നറിയിപ്പുമായി ആദായ നികുതി വകുപ്പ്. ഇത്തരം ഇടപാടുകള്‍ കണ്ടെത്തിയാല്‍ പണം സ്വീകരിക്കുന്നയാളില്‍ നിന്നും ഇതേ തുക പിഴയായി ഇടാക്കുമെന്നാണ് ആദായ നികുതി വകുപ്പ് മുന്നറിയിപ്പ് നല്‍കുന്നത്.

ഇത്തരം ഇടപാടുകള്‍ ആരെങ്കിലും കണ്ടാല്‍ 'blackmoneyinfo@incometax.gov.in എന്ന ഇമെയ്‌ലില്‍ രഹസ്യ വിവരം നല്‍കണമെന്നും ആദായ നികുതി വകുപ്പ് നിര്‍ദേശം നല്‍കി. ഫിനാന്‍സ് ആക്ട് 2017 പ്രകാരം രണ്ട് ലക്ഷം രൂപയ്ക്ക് മുകളിലുള്ള കറന്‍സി ഇടപാടുകള്‍ ഏപ്രില്‍ ഒന്നുമുതല്‍ സര്‍ക്കാര്‍ നിരോധിച്ചിട്ടുണ്ട്.

രണ്ട് ലക്ഷം രൂപയ്ക്ക് മുകളിലുള്ള തുക ഒരു പ്രത്യേക ഇടപാടിനോ, ഒരു ദിവസം നടക്കുന്നതോ, ഒരു വ്യക്തിക്കോ കൈമാറ്റം ചെയ്യുന്നത് ആദായ നികുതി വകുപ്പും നിരോധിച്ചിട്ടുണ്ട്.