കൊച്ചി: തുടര്‍ച്ചയായ 57 ദിവസത്തെ വിലയിടിവിന് ശേഷം പെട്രോള്‍ വിലയില്‍ വര്‍ധനവ്. പെട്രോള്‍ ലിറ്ററിന് 11 പൈസയാണ് ഇന്ന് കൂടിയിരിക്കുന്നത്. ഡീസല്‍ വിലയില്‍ മാറ്റമില്ല. ആഗോള വിപണിയില്‍ അസംസ്‌കൃത എണ്ണവിലയില്‍ ഉണ്ടായ നേരിയ വര്‍ധനവിനെ തുടര്‍ന്നാണ് എണ്ണക്കമ്പനികള്‍ രാജ്യത്തെ പെട്രോള്‍ വിലയും ഉയര്‍ത്തിയിരിക്കുന്നത്. 

കൊച്ചി നഗരത്തില്‍ ഇന്നലെ 72.03 രൂപ വരെയായിരുന്ന പെട്രോള്‍ വില ഇന്ന് 72.14 രൂപയായി. 68.22 രൂപയാണ് കൊച്ചിയിലെ ഡീസല്‍ വില. 70.29 രൂപയാണ് ഡല്‍ഹിയില്‍ ഇന്നത്തെ പെട്രോള്‍ വില. മുംബൈയില്‍ പെട്രോളിന്റെ വില 70.29 രൂപയും, ഡീസലിന്റെ വില 64.66 രൂപയുമാണ്. 

വരും ദിവസങ്ങളിലും ഇന്ധന വിലയില്‍ വര്‍ധനവുണ്ടാകുമെന്നാണ് വിലയിരുത്തപ്പെടുന്നത്. ഒരുഘട്ടത്തില്‍ 85 രൂപയ്ക്ക് മുകളില്‍ എത്തിയ ഇന്ധന വിലയായിരുന്നു പടിപടിയായി കുറഞ്ഞ് 72 രൂപയിലെത്തിയത്.  അഞ്ച് സംസ്ഥാനങ്ങളിലെ തെരഞ്ഞെടുപ്പിന്റെ കൂടി പശ്ചാത്തലത്തിലായിരുന്നു അത്.