ന്യൂഡല്‍ഹി: രാജ്യത്തെ പ്രമുഖ പൊതുമേഖല ബാങ്കായ എസ്ബിഐ വീണ്ടും നിക്ഷേപ പലിശ നിരക്ക് കുറച്ചു. ഈ മാസം ഇത് രണ്ടാം തവണയാണ് എസ്ബിഐ നിക്ഷേപ പലിശനിരക്ക് കുറയ്ക്കുന്നത്. സ്ഥിരനിക്ഷേപ നിരക്കില്‍ 40 ബേസിക് പോയന്റിന്റെ കുറവാണ് വരുത്തിയത്. പുതിയ നിരക്ക് ഇന്നുമുതല്‍ പ്രാബല്യത്തില്‍ വരും.

വലിയ തോതിലുളള നിക്ഷേപങ്ങളുടെ പലിശ നിരക്കിലും കുറവ് വരുത്തിയിട്ടുണ്ട്. രണ്ടു കോടി രൂപയും അതിന് മുകളിലുമുളള നിക്ഷേപങ്ങളുടെ പലിശ നിരക്കിലാണ് കുറവ് വരുത്തിയത്. 50 ബേസിക് പോയന്റിന്റെ കുറവാണ് വരുത്തിയത്. ഈ വിഭാഗത്തില്‍ പരമാവധി നല്‍കുന്ന പലിശനിരക്ക് മൂന്നുശതമാനമാണ്.

പുതുക്കിയ നിരക്ക് അനുസരിച്ച് 7 ദിവസം മുതല്‍ 45 ദിവസം വരെയുള്ള നിക്ഷേപങ്ങളുടെ പലിശ 2.9 ശതമാനമായി. 46 ദിവസം മുതല്‍ 179 ദിവസംവരെയുള്ള പലിശ 3.9 ശതമാനവുമാണ്.180 ദിവസംമുതല്‍ ഒരു വര്‍ഷത്തിനു താഴെ 4.4 ശതമാനം,ഒരു വര്‍ഷം മുതല്‍ 3 വര്‍ഷംവരെ 5.1 ശതമാനം,3വര്‍ഷം മുതല്‍ 5 വര്‍ഷംവരെ 5.3 ശതമാനം,5 മുതല്‍ 10 വര്‍ഷംവരെ 5.4 ശതമാനം എന്നിങ്ങനെയാണ് മറ്റു സ്ഥിര നിക്ഷേപങ്ങളുടെ പുതുക്കിയ നിരക്ക്.

മുതിര്‍ന്ന പൗരന്മാര്‍ക്ക് അരശതമാനം പലിശ അധികം ലഭിക്കും. ആര്‍ബിഐ കഴിഞ്ഞയാഴ്ചയില്‍ റിപ്പോ നിരക്കില്‍ 40 ബേസിസ് പോയന്റിന്റെ കുറവുവരുത്തിയതിന്റെ പിന്നാലെയാണ് പലിശനിരക്കുകള്‍ ബാങ്ക് വീണ്ടും പരിഷ്‌കരിച്ചത്.