ന്യൂഡൽഹി: ഇന്ത്യൻ ഓൺലൈൻ സ്മാർട്ട്‌ഫോൺ വിപണിയിൽ കഴിഞ്ഞവർഷം മൂന്നാം സ്ഥാനം നേടിയെടുത്ത റിയൽമി എതിരാളികൾക്ക് കടുത്ത മത്സരം നൽകി പുത്തൻ മോഡൽ അവതരിപ്പിക്കാൻ ഒരുങ്ങിക്കഴിഞ്ഞു. മിഡ് റേഞ്ച് വിഭാ​ഗത്തിൽ റിയൽമി 8 പ്രോ വിപണിയിലെത്തിക്കുകയാണ് കമ്പനി. 108 എംപി സെൻസർ ആണ് മോഡലിന്റെ പ്രധാന സവിശേഷതകളിലൊന്ന്. 

നീല, കറുപ്പ്, മഞ്ഞ എന്നിങ്ങനെ മൂന്ന് നിറങ്ങളിലാണ് റിയൽമി 8 പ്രോ എത്തുക. ക്യാമറ മൊഡ്യൂളിന് ചുറ്റുമായി നൽകിയിരിക്കുന്ന ഫ്ലൂറസെന്റ് മെറ്റീരിയലും “ഡെയർ ടു ലീപ്” എന്ന എഴുത്തും ഡിസൈനിന്റെ ഭാ​ഗമാണ്. ഡെയർ ടു ലീപ് അക്ഷരങ്ങൾ പ്രകാശത്തെ ആഗിരണം ചെയ്യുകയും പിന്നീട് ഇരുട്ടിൽ സ്വയം തിളങ്ങുകയും ചെയ്യും.

ലോകത്തിലെ ആദ്യത്തെ ‘സ്റ്റാർറി ടൈം-ലാപ്‌സ്’ വീഡിയോ വാ​ഗ്ദാനം ചെയ്താണ് കമ്പനി ഈ പുതിയ മോഡൽ അവതരിപ്പിക്കുന്നത്. സ്റ്റാർ‌റി മോഡിൽ‌ ഷൂട്ട് ചെയ്യുമ്പോൾ നാല് മിനിറ്റോളം ഓരോ 15 സെക്കന്റിലും 16 ഫോട്ടോകൾ‌ എടുക്കുന്നു. ഒടുവിൽ അവയെ ഒരു അന്തിമ ചിത്രമായി സംയോജിപ്പിക്കും. പ്രൊഫഷണൽ ക്യാമറയോ വിഡിയോ എഡിറ്റിംഗ് സോഫ്റ്റ് വെയറോ ഇല്ലാതെ സ്റ്റാർറി ടൈം-ലാപ്സ് വീഡിയോ ഷൂട്ട് ചെയ്യാൻ ഇതുവഴി സാധിക്കുമെന്ന് ഇവർ അവകാശപ്പെടുന്നു. ലോകത്തിലെ ആദ്യത്തെ ‘ടിൽറ്റ്-ഷിഫ്റ്റ് ടൈം-ലാപ്സ്’ സവിശേഷതയും ഫോൺ വാഗ്ദാനം ചെയ്യുന്നു. ടിൽറ്റ്-ഷിഫ്റ്റ് മോഡ് 10x പ്ലേബാക്ക് ഉപയോഗിച്ച് ടൈം-ലാപ്സ് വീഡിയോകൾ ഷൂട്ട് ചെയ്യാൻ കഴിയും. 

6.4 ഇഞ്ച് റിയൽമി 8 പ്രോയ്ക്ക് 6 ജിബി + 128 ജിബി, 8 ജിബി + 128 ജിബി എന്നിങ്ങനെ രണ്ട് മെമ്മറി വേരിയന്റുകളുണ്ട്. 17,999 രൂപ, 19,999 രൂപ എന്നിങ്ങനെയാണ് വില. രണ്ട് സിം കാർഡുകൾക്കും ഒരു എസ്ഡി കാർഡിനുമായി (256 ജിബി വരെ) മൂന്ന് കാർഡ് സ്ലോട്ടുകൾ ഫോണിലുണ്ട്.