ആലോചിക്കാന്‍ ഒട്ടും സമയമില്ലായിരുന്നു; തലകീഴായി കിണറ്റിലിറങ്ങി പൂര്‍ണ ഗര്‍ഭിണിയെ പുറത്തെത്തിച്ച് പൊലീസുകാരന്റെ സാഹസികത (വീഡിയോ)
തായ്‌ലന്‍ഡിലെ ഗുഹയില്‍ അകപ്പെട്ടുപോയ ഫുട്‌ബോള്‍ കോച്ചിനേയും താരങ്ങളേയും മനുഷ്യ പ്രയത്‌നത്തിന്റെ ബലത്തില്‍ രക്ഷിച്ചെടുത്തത് ലോകം മുഴുവന്‍ കണ്ടിരുന്നു. ഇപ്പോഴിതാ ചൈനയില്‍ നിന്ന് മറ്റൊരു സാഹസിക രക്ഷപ്പെടുത്തലിന്റെ വാര്‍ത്തകള്‍.
പൂര്‍ണ ഗര്‍ഭിണിയായ സ്ത്രി നല്ല ആഴമുള്ള എന്നാല്‍ വീതി കുറഞ്ഞ കിണറ്റില്‍ വീണു. അവരെ രക്ഷിക്കാന്‍ പൊലീസുകാരും നാട്ടുകാരും ചേര്‍ന്ന നടത്തിയ രക്ഷാപ്രവര്‍ത്തനത്തിന്റെ വീഡിയോ സമൂഹ മാധ്യമങ്ങള്‍ ഏറ്റെടുത്തിരിക്കുകയാണിപ്പോള്‍.
രക്ഷാപ്രവര്‍ത്തകരായ പൊലീസുകാരില്‍ ഒരാളായ സാങ് സിയാങ് തന്റെ ഇടുപ്പില്‍ കയര്‍ കെട്ടി തല കീഴായി കിണറ്റിലിറങ്ങി ഗര്‍ഭിണിയെ രക്ഷപ്പെടുത്തന്നതാണ് വീഡിയോയിലുള്ളത്.
കിഴക്കന്‍ ചൈനയിലെ ആന്‍ഹുയി പ്രദേശത്താണ് സംഭവം അരങ്ങേറിയത്. എന്നാല്‍ ഗര്‍ഭിണിയായ വനിത എങ്ങിനെയാണ് കിണറ്റില്‍ വീണതെന്ന് റിപ്പോര്‍ട്ടുകള്‍ പറയുന്നില്ല. എന്തായാലും സമയം പാഴാക്കാതെ സാഹസികമായി സ്ത്രീയെ രക്ഷപ്പെടുത്തിയ പൊലീസുകാരന്‍ അവരുടെ ഉദരത്തില്‍ വളരുന്ന കുഞ്ഞ് ജീവനേയും ഒപ്പം രക്ഷിച്ചെടുത്തു.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ