ആലപ്പുഴ: നിവരധി വിവാഹവീഡിയോകള്‍ ഇക്കാലത്ത് സമൂഹമാധ്യമങ്ങളില്‍ വൈറലാകാറുണ്ട്. വിവാഹഷൂട്ടുകള്‍ വ്യത്യസ്തമാക്കുന്നതിലാണ് ന്യൂജന്‍ പിള്ളേര്‍ക്ക് താത്പര്യം. ഇപ്പോഴിതാ ഒരു പോസ്റ്റ് വെഡ്ഡിംഗ് ഷൂട്ട് വെള്ളത്തിലായ കഥ പങ്കുവെക്കുകയാണ് സോഷ്യല്‍ മീഡിയ.
ലൊക്കേഷന്‍ കുട്ടനാട്. കായല്‍പ്പരപ്പിലൂടെ വഞ്ചി തുഴഞ്ഞ് പോകുന്ന ദമ്പതികള്‍. കയ്യില്‍ ആമ്പല്‍പ്പൂവൊക്കെയായി സംഭവം കളറാണ്. ക്യാമറാമാന്‍മാരുടെ ആവശ്യപ്രകാരം കൊതുമ്പു വള്ളത്തിലിരുന്ന് കലക്കനൊരു ഫൊട്ടോയ്ക്ക് പോസ് ചെയ്യുകയായിരുന്നു ചെക്കനും പെണ്ണും. ഫൊട്ടോ പോസിംഗ് ഒരു വശത്ത് തകൃതിയായി നടക്കുമ്പോഴും വെള്ളത്തിനു നടുവിലെ ആ ഫൊട്ടോഷൂട്ടില്‍ ചെക്കനും പെണ്ണിനും അല്‍പ സ്വല്‍പം പേടിയുണ്ടായിരുന്നു എന്ന് വ്യക്തം. മുകളിലേക്ക് നോക്കി അതിമനോഹരമായി പോസ് ചെയ്യുന്ന ദമ്പതികളോട് 'ബ്യൂട്ടിഫുള്‍' എന്ന് പറയുന്ന കാമറാമാന്‍. എന്നാല്‍ അപ്രതീക്ഷിതമായി വഞ്ചി മറിഞ്ഞ് ഇരുവരും വെള്ളത്തിലേക്ക് വീഴുന്നതോടെ റൊമാന്‍സ് 'ഹ്യൂമര്‍' ആയി മാറി. ഫ്രെയിമില്‍ കൂട്ടച്ചിരി.
അടുത്തിടെ വിവാഹിതരായ ആലപ്പുഴ എടത്വാ സ്വദേശി ഡെന്നിയും തൃശൂര്‍ ഒല്ലൂര്‍ സ്വദേശിനി പ്രിയ റോസുമാണ് ഫ്രെയിമില്‍.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ