പൂനെ: മകനൊപ്പം പരീക്ഷയെഴുതി മുന്നും ജയം നേടിയിരിക്കുകയാണ് മുപ്പത്തിയാറുകാരിയായ ബേബി ഗുരാവ്. മഹാരാഷ്ട്രയിലെ എസ് എസ് സി പരീക്ഷയിലാണ് ബാരാമതി സ്വദേശിയായ വീട്ടമ്മ ഉന്നതവിജയം കരസ്ഥമാക്കിയത്. ബേബി 64.40 ശതമാനം മാര്‍ക്ക് നേടിയപ്പോള്‍ പതിനാറുകാരനായ മകന്‍ 73.20 ശതമാനം മാര്‍ക്ക് സ്വന്തമാക്കി. 

കഴിഞ്ഞ ബുധനാഴ്ച വന്ന പരീക്ഷാഫലത്തിലാണ് അമ്മയും മകനും ഒന്നിച്ച് ഉന്നതവിജയം നേടിയത്. വിവാഹത്തോടെ പഠനം നിര്‍ത്തേണ്ടിവന്നതിനാല്‍ ബേബിക്ക് സ്‌കൂള്‍ വിദ്യാഭ്യാസം പൂര്‍ത്തിയാക്കാന്‍ സാധിച്ചിരുന്നില്ല. എന്നാല്‍ ഭര്‍ത്താവിന്റെ പിന്തുണയോടെയാണ് താന്‍ മകനൊപ്പം പത്താം ക്ലാസ് പരീക്ഷ എഴുതിയതെന്ന് ബേബി പറയുന്നു. തുണി നിര്‍മ്മാണ സ്ഥാപനത്തിലെ ജീവനക്കാരനാണ് ബേബിയുടെ ഭര്‍ത്താവ് പ്രദീപ്. 

പ്രദീപും മകന്‍ സഹാനന്ദും പഠനത്തില്‍ തന്നെ വളരെയധികം സഹായിച്ചിട്ടുണ്ടെന്നാണ് ബേബിയുടെ വാക്കുകള്‍. ജോലിക്കിടയിലെ ഒഴിവുസമയം പഠനത്തിനായി മാറ്റിവയ്ക്കുകയായിരുന്നു ബേബി. വൈകുന്നേരങ്ങളില്‍ മകന്റെ ഒപ്പമിരുന്ന് പഠിച്ച ഭാഗങ്ങള്‍ വീണ്ടും ആവര്‍ത്തിക്കും. 

മകനും ഭാര്യയും വളരെയധികം കഠിനാധ്വാനം ചെയ്തിരുന്നെന്നും ഇരുവരുടെയും വിജയത്തില്‍ തനിക്ക് വളരെയധികം സന്തോഷവും അഭിമാനവും ഉണ്ടെന്ന് പ്രദീപ് പറഞ്ഞു. ഈ വിജയം ആത്മവിശ്വാസം നേടിതന്നെന്നും 12-ാം ക്ലാസ് പരീക്ഷയെഴുതാനാണ് ഇനി തന്റെ ഒരുക്കമെന്നും ബേബി പറയുന്നു.