ലോകത്തിലെതന്നെ ഏറ്റവും വലിയ കളർ ഡയമണ്ടുകളിൽ ഒന്ന് റഷ്യയിൽ കണ്ടെത്തി. ചുവപ്പു കലർന്ന മഞ്ഞനിറത്തിലുള്ള 236 കാരറ്റ് ഡയമണ്ടാണ് കണ്ടെത്തിയത്. റഷ്യയിൽ ഇതുവരെ ഖനനം ചെയതതിൽ ഏറ്റവും വലിയ കളർ ഡയമണ്ടാണിത്. അനബർ നദിയിലുള്ള എബ്ലെയാഖ് ഭാഗത്തു നിന്നുമാണ് ഈ അമൂല്യം രത്നം കണ്ടെത്തിയിരിക്കുന്നത്.

ലോകത്തെ തന്നെ ഏറ്റവും വലിയ വജ്ര നിർമ്മാതാക്കളായ അൽറോസയാണ് വജ്രം കണ്ടെത്തിയത്. നിലവിൽ 47 x 24 x 22 മില്ലീമീറ്റർ അളവുള്ളതാണ് ഈ പരുക്കൻ രത്നം. ഏകദേശം 120 മുതൽ 230 ദശലക്ഷം വർഷം വരെ പഴക്കമുണ്ടാകുമെന്നാണ് പ്രാഥമിക നി​ഗമനം. അസാധാരണമായാണ് ഇത്തരത്തിലുള്ള കളർ വജ്രങ്ങൾ കണ്ടെത്താറുള്ളതെന്ന് അൽറോസയുടെ കട്ടിങ് ആന്റ് പോളിഷിങ് മേധാവി പവേൽ വിനിഖിൻ പറഞ്ഞു.

ഈ വജ്രം പരുക്കൻ രൂപത്തിൽ തന്നെ സൂക്ഷിക്കുമോ അതോ വിൽക്കുമോ എന്ന കാര്യത്തിൽ ഇതുവരെ തീരുമാനമെടുത്തിട്ടില്ല. അതികഠിന ശൈത്യമേഖലയായ റഷ്യയിലെ വടക്കൻ‍ പ്രവശ്യയിലാണ് വജ്രം കണ്ടെത്തിയത്. ഇവയുടെ വികസനം സാധാരണയായി വേനൽക്കാലത്ത് മാത്രമായി പരിമിതപ്പെടുത്തിയിരിക്കുന്നതിനാലാണ് ഇത്രയധികം വർഷം പഴക്കമുണ്ടാകുമെന്ന് വിലയിരുത്തുന്നത്.