ബംബോളിന്‍: ആതിഥേയര്‍ക്ക് മുന്നില്‍ പരാജയപ്പെട്ട് കേരളം സന്തോഷ് ട്രോഫിയില്‍ പുറത്ത്. ഒന്നിനെതിരേ രണ്ട് ഗോളുകള്‍ക്കാണ് ഗോവയ്ക്ക് മുന്നില്‍ കേരളം അടിയറവ് പറഞ്ഞത്. കളത്തില്‍ മുഴുവന്‍ നിറഞ്ഞു കളിച്ച കേരളത്തിന് മുന്നില്‍ പ്രതിരോധക്കോട്ട തീര്‍ത്താണ് ഗോവ ബംഗാളിനെതിരേ ഫൈനലിന് ഇടം നേടിയത്.
മുന്നേറ്റത്തിന് ആവോളം മൂര്‍ച്ചയുണ്ടായിരുന്നെങ്കിലും കേരളത്തിന്റെ പ്രതിരോധത്തിലുള്ള വിള്ളലുകള്‍ മുതലെടുത്താണ് ഗോവ രണ്ടു ഗോളുകളും നേടിയത്. ജിഎംസി അത്‌ലറ്റിക്ക്‌സ് സ്‌റ്റേഡിയത്തില്‍ നിറഞ്ഞ ഗ്യാലറിക്ക് മുന്നില്‍ കേരളം മനോഹര കളിയാണ് പുറത്തെടുത്തതെങ്കിലും പരാജയമായിരുന്നു അന്തിമ ഫലം.
കൗണ്ടര്‍ അറ്റാക്കുകളായിരുന്നു ഗോവയുടെ കളിയായുധം. എന്നാല്‍ ഏത് രീതിയിലും ആക്രമിച്ചു കളിക്കുക എന്നായിരുന്നു കേരളത്തിന്റെ തന്ത്രവും. കളിയില്‍ പന്ത് കൈവശം വെക്കുന്നതില്‍ കേരളം മുന്നിട്ടു നിന്നപ്പോഴും കിട്ടിയ അവസരങ്ങള്‍ മുതലാക്കി അണ്ടര്‍ 21 താരം ലിസ്റ്റണ്‍ കൊളാസ് കേരത്തിന്റെ കഥകഴിച്ചു. ഇന്ത്യയ്ക്ക് മികച്ച ഒരു സ്‌ട്രൈക്കര്‍ കൂടി വരുന്നുണ്ടെന്ന് തെളിയിക്കുന്നതായിരുന്ന കേരളത്തിനെതിരേ കൊളാസിന്റെ കളിമികവ്. ഞായറാഴ്ച നടക്കുന്ന ഫൈനലില്‍ ബംഗാളാണ് ഗോവയ്ക്ക് എതിരാളി.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ