പ്രളയത്തിന്റെ ദുരിതം പേറുന്ന കേരളത്തിലെ ജനങ്ങള്‍ക്ക് ഒപ്പം നില്‍ക്കുന്നുവെന്ന് പാക് ക്രിക്കറ്റ് താരം ഹസന്‍ അലി. കേരളത്തിന് പിന്തുണ നേര്‍ന്ന് ലോകത്തിന്റെ വിവിധ ഭാഗങ്ങളില്‍ നിന്നും പ്രതികരണം വരുന്നതിന് ഇടയിലാണ് പാക് ക്രിക്കറ്റ് താരവും സഹായഹസ്തവുമായി മുന്നോട്ടെത്തുന്നത്.
കേരളത്തിലെ ജനങ്ങള്‍ക്കൊപ്പം എന്റെ പ്രാര്‍ഥനയുണ്ട്. നമ്മുടെ പിന്തുണ നമുക്ക് അവരെ അറിയിക്കാം. സഹാനുഭൂതിക്ക് അതിര്‍വരമ്പുകളില്ല. പാക്കിസ്ഥാനില്‍ നിന്നും പ്രാര്‍ഥനകള്‍ എന്ന് ഹസന്‍ അലി തന്റെ ട്വിറ്ററില്‍ കുറിക്കുന്നു.
കേരളത്തിന് പിന്തുണയര്‍പ്പിച്ചെത്തിയ ഹസന്‍ അലിക്ക് മലയാളികള്‍ സമൂഹമാധ്യമങ്ങളിലൂടെ നന്ദി പറയുന്നുമുണ്ട്. കഴിഞ്ഞ ദിവസം പാക്കിസ്ഥാന്‍ മുന്‍ നായകന്‍ ഷാഹിദ് അഫ്രീദിയും കേരളത്തിനൊപ്പം നില്‍ക്കുന്നുവെന്ന് വ്യക്തമാക്കി മുന്നോട്ടു വന്നിരുന്നു. മനുഷ്യത്വത്തിന്റെ പ്രതീക്ഷകള്‍ അസ്തമിച്ചിട്ടില്ല എന്നായിരുന്നു അഫ്രീദിയുടെ വാക്കുകള്‍.
ഫുട്‌ബോളിനെ നെഞ്ചോട് ചേര്‍ക്കുന്ന കേരളത്തിലെ ജനങ്ങള്‍ക്ക് ആപത്ഘട്ടത്തില്‍ തങ്ങളുടെ പിന്തുണ അറിയിച്ച് ഫുട്‌ബോള്‍ ക്ലബുകളായ ബാഴ്‌സ, ലിവര്‍പൂള്‍, റോമ എന്നിവരും മുന്നോട്ടു വന്നിരുന്നു. മുഖ്യമന്ത്രിയുടെ ദുരിതാശ്വാസ നിധിയിലേക്ക് സംഭാവന എത്തിച്ച് കേരളത്തിലെ ജനങ്ങള്‍ക്കൊപ്പം നില്‍ക്കാനായിരുന്നു ആരാധകരോട് ക്ലബുകള്‍ ആവശ്യപ്പെട്ടത്.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ