പാകിസ്ഥാന്റെ പ്രധാനമന്ത്രി പദത്തിന് തൊട്ടരികില്‍ എത്തി നില്‍ക്കുകയാണ് ഇമ്രാന്‍ ഖാന്‍. അട്ടിമറികള്‍ ഒന്നുമുണ്ടായില്ലെങ്കില്‍ പാക് ക്രിക്കറ്റിന്റെ മുന്‍ നായകന്‍ പാക്കിസ്ഥാന്റെ നായകനാവും. ഇമ്രാന്‍ ഖാന്‍ പ്രധാനമന്ത്രി പദത്തിലേക്ക് എത്തുമ്പോള്‍ മുന്‍പ് കമന്ററി ബോക്‌സിലിരുന്ന ഗവാസ്‌കര്‍ നടത്തിയ പ്രവചനമാണ് ഇപ്പോള്‍ കൗതുകമുണര്‍ത്തുന്നത്.
ഇന്ത്യാ-ബംഗ്ലാദേശ് മത്സരത്തിന് ഇടയിലായിരുന്നു അത്. ഗാവസ്‌കറിനൊപ്പം കമന്ററി ബോക്‌സില്‍ പാക്കിസ്ഥാന് മുന്‍ ക്രിക്കറ്റ് താരം റമിസ് രാജ. ഒരു സംഭവം വിവരിക്കുന്നതിന് ഇടയില്‍ റമീസ് രാജ ഇമ്രാന്‍ ഖാനെ അനുകരിച്ചു.
എന്നാല്‍ ഗാവസ്‌കര്‍ റമീസ് രാജയ്ക്ക് താക്കീത് നല്‍കി. അങ്ങിനെ ചെയ്യരുത്. കാരണം നിങ്ങള്‍ അനുകരിക്കുന്ന വ്യക്തി പാക്കിസ്ഥാന്റെ അടുത്ത പ്രധാനമന്ത്രി ആയേക്കാം എന്നായിരുന്നു ഗാവസ്‌കറിന്റെ വാക്കുകള്‍.
പാക് തെരഞ്ഞെടുപ്പില്‍ ഇമ്രാന്റെ തെഹ്രീക് ഇ ഇന്‍സാഫ് മുന്നിലെത്തിയെങ്കിലും സര്‍ക്കാര്‍ രൂപീകരിക്കാന്‍ സഖ്യ സാധ്യതകള്‍ തേടണം. 1992ല്‍ പാക്കിസ്ഥാനെ ലോക കപ്പ് കിരീട നേട്ടത്തിലേക്ക് നയിച്ച ഇമ്രാന്‍ ഖാനിലൂടെ 'നയ പാക്കിസ്ഥാന്' വേണ്ടിയുള്ള പ്രതീക്ഷയിലാണ് പാക് ജനത.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ