നാല് ബോളില്‍ നിന്നും വേണ്ടത് ആറ് റണ്‍സ്. ആദ്യ ട്വിന്റി20 ലോക കിരീടത്തില്‍ മുത്തമിടാന്‍ പാക്കിസ്ഥാന് വേണ്ടിയിരുന്നത് ആറ് റണ്‍സ് മാത്രം. പക്ഷേ ജീവിതത്തില്‍ തരളാതെ പോരാടിയ ജോഗിന്ദറില്‍ വിശ്വാസം അര്‍പ്പിച്ച ധോനിയും ചോരാത്ത കൈകളുമായി ശ്രീശാന്തും ആ കിരീടം ഇന്ത്യയുടെ കൈകളിലേക്ക് എടുത്തു വയ്ക്കുകയായിരുന്നു.
അന്ന് ശ്രീശാന്ത് ആ ക്യാച്ച് വിട്ടു കളഞ്ഞിരുന്നെങ്കിലോ? ഇന്ത്യാ ടുഡേയുടെ സലാം ക്രിക്കറ്റ് 2018ല്‍ എത്തിയപ്പോള്‍ ഹര്‍ഭജന്‍ സിങ്ങിന് നേര്‍ക്ക് ഉയര്‍ന്ന ചോദ്യം അതായിരുന്നു. ആ ലോക കപ്പിന് ശേഷം നടന്ന ഐപിഎല്ലില്‍ സംഭവിച്ചത് ആ ക്യാച്ച് വിട്ട സമയം സംഭവിക്കുമായിരുന്നു എന്നായിരുന്നു ഹര്‍ഭജന്റെ മറുപടി.
2008 ഐപിഎല്ലില്‍ ശ്രീശാന്തിന്റെ മുഖത്ത് ഹര്‍ഭജന്‍ അടിച്ച സംഭവം ഓര്‍മിപ്പിച്ചായിരുന്നു ഭാജിയുടെ മറുപടി. മുംബൈ ഇന്ത്യന്‍സും കിങ്‌സ് ഇലവന്‍ പഞ്ചാബും തമ്മിലുള്ള മത്സരത്തിന് ശേഷം കരഞ്ഞുകൊണ്ട് ശ്രീശാന്ത് ഗ്രൗണ്ടില്‍ പ്രത്യക്ഷപ്പെട്ടതോടെയായിരുന്നു ആ വിവാദത്തിന്റെ തുടക്കം. ശ്രീശാന്തിന്റെ വാക്കുകളില്‍ പ്രകോപിതനായി ഹര്‍ഭജന്‍ ശ്രീശാന്തിന്റെ മുഖത്ത് അടിക്കുകയായിരുന്നു എന്നായിരുന്നു ബിസിസിഐയുടെ അന്വേഷണത്തിലെ കണ്ടെത്തല്‍.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ