ദുബായ്: ഏഷ്യാ കപ്പിൽ ഇന്ത്യ ദുർബലരായ ഹോങ്കോങിനോട് കഷ്ടിച്ച് കടന്നുകൂടി വിജയം സ്വന്തമാക്കി. വിരാട് കോഹ്ലിക്ക് വിശ്രമം അനുവദിച്ച് രോഹിത് ശർമയാണ് ഇന്ത്യയെ നയിക്കുന്നത്. കോഹ്ലിയില്ലാത്ത ടീമിൽ മുൻ നായകനും മുതിർന്ന താരവുമായ മഹേന്ദ്ര സിങ് ധോണി  നിർണായക സാന്നിധ്യമാണെന്ന് ക്രിക്കറ്റ് വി​ദ​ഗ്ധർ ചൂണ്ടിക്കാട്ടിയിരുന്നു. ആരാധകരും ആ പ്രതീക്ഷയിൽ തന്നെയായിരുന്നു.  ധോണിയുടെ സാന്നിധ്യം ടീമിന് ആത്മവിശ്വാസം നല്‍കുമെന്ന് അമ്പാട്ടി റായിഡു അടക്കമുള്ള താരങ്ങളും പറഞ്ഞിരുന്നു. 

എന്നാല്‍ ഹോങ്കോങിനെതിരായ പോരാട്ടത്തിൽ അഞ്ചാമനായി ഇറങ്ങിയ ധോനി അക്കൗണ്ട് തുറക്കും മുൻപ് പുറത്തായത് ആരാധകരിൽ അമ്പരപ്പും ഞെട്ടലുമുണ്ടാക്കി. നേരിട്ട മൂന്നാം പന്തില്‍ ധോനിയെ എഹ്‌സാന്‍ ഖാന്‍ വിക്കറ്റ് കീപ്പറുടെ കൈയിലെത്തിക്കുകയായിരുന്നു. ​ഗാലറിയിലെ പലരുടെ മുഖത്തും ഈ അമ്പരപ്പ് കാണാമായിരുന്നു. അത് വിശ്വസിക്കാൻ പോലും സാധിക്കാത്ത തരത്തിലുള്ള ഭാവങ്ങളായിരുന്നു പലരിലും.

ഈ കൂട്ടത്തിൽ ഒരു കുഞ്ഞു ആരാധകന്റെ നിരാശാ ഭാവങ്ങളും പ്രകടനങ്ങളും ഇപ്പോള്‍ സോഷ്യല്‍ മീഡിയയിൽ വൈറലാണ്. ഈ വീഡിയോയില്‍ തന്റെ നിരാശയും ദേഷ്യവുമെല്ലാം ഈ ആരാധകന്‍ കാണിക്കുന്നുണ്ട്.