വാന്‍കൂവര്‍: യൂണിവേഴ്‌സല്‍ ബോസ് വീണ്ടും താന്‍ തന്നെയെന്ന് തെളിയിച്ച് ക്രിസ് ഗെയ്ല്‍. കാനഡ ഗ്ലോബല്‍ ലീഗിലാണ് വീണ്ടും ഗെയ്‌ലിന്റെ തകര്‍പ്പന്‍ ബാറ്റിങ് വന്നത്. ഒരു ഓവറില്‍ അടിച്ചു കൂട്ടിയത് 32 റണ്‍സ്. 

നാല് സിക്‌സും, രണ്ട് ഫോറുമാണ് പാക് ബൗളര്‍ ശതാബ് ഖാന്‍ എറിഞ്ഞ 13ാം ഓവറില്‍ ഗെയ്ല്‍ അടിച്ചെടുത്തത്. 44 പന്തില്‍ നിന്നും 94 റണ്‍സ് അടിച്ചു കൂട്ടിയ ഗെയ്‌ലിന് പക്ഷേ ലീഗിലെ രണ്ടാം സെഞ്ചുറി നഷ്ടമായി. 

ഗെയ്‌ലിന്റെ ഇന്നിങ്‌സില്‍ ആകെ വന്നത് 9 സിക്‌സും, ആറ് ഫോറും. ഗെയ്‌ലിന്റെ ബാറ്റിങ് മികവില്‍ എഡ്മണ്ടന്‍ റോയല്‍സിനെ വാന്‍കൂവര്‍ നൈറ്റ്‌സ് ആറ് വിക്കറ്റിന് തോല്‍പ്പിച്ചു. ഇതിന് മുന്‍പ് നടന്ന മത്സരത്തില്‍ 122 റണ്‍സ് ഗെയ്ല്‍ അടിച്ചെടുത്തിരുന്നു.