ബോസ്റ്റണ്‍: പ്രീ സീസണിലെ രണ്ടാം പോരാട്ടത്തിലും ചാമ്പ്യന്‍സ് ലീഗ് കിരീട ജേതാക്കളായ ലിവര്‍പൂളിന് തോല്‍വി. സ്പാനിഷ് ടീം സെവിയ്യയോട് അവര്‍ സൗഹൃദ പോരാട്ടത്തില്‍ 2-1ന് പരാജയമേറ്റു വാങ്ങി. നേരത്തെ കഴിഞ്ഞ ദിവസം ലിവര്‍പൂള്‍ ജര്‍മന്‍ ടീം ബൊറൂസിയ ഡോര്‍ട്മുണ്ടിനോടും തോല്‍വി ഏറ്റുവാങ്ങിയിരുന്നു. 

ഇടയ്ക്ക് പത്ത് പേരായി ചുരുങ്ങിയിട്ടും കളിയുടെ  അവസാന നിമിഷം നേടിയ ഗോളിലായിരുന്നു സെവിയ്യയുടെ വിജയം. ത്സരത്തില്‍ സെവിയ്യ ആയിരുന്നു ആദ്യം ലീഡ് എടുത്തത്. 37ാം മിനുട്ടില്‍ നൊലീറ്റോ ലീഡ് സമ്മാനിച്ചു. എന്നാല്‍ ആ ഗോളിന് ഏഴ് മിനുട്ടിനുള്ളില്‍ തന്നെ ലിവര്‍പൂള്‍ മറുപടി നല്‍കി. 44ാം മിനുട്ടില്‍ ഡിവോക്ക് ഒറിഗിയിലൂടെ അവര്‍ സമനില പിടിച്ചു. 

രണ്ടാം പകുതി തുടങ്ങി മത്സരം 76ാം മിനുട്ടിലെത്തിയപ്പോള്‍ അനാവശ്യ ടാക്ലിങിലൂടെ സെവിയ്യയുടെ നാനോണ്‍ ചുവപ്പ് കണ്ട് പുറത്തു പോയി. ലിവര്‍പൂള്‍ താരം യാസ്സര്‍ ലരൗസിയെ അപകടകരമാം വിധം ഫൗള്‍ ചെയ്തതിന് റഫറി താരത്തിന് നേരിട്ട് തന്നെ ചുവപ്പ് കാര്‍ഡ് നല്‍കി. ഇതോടെ സെവിയ്യ പത്ത് പേരായി ചുരുങ്ങി. 

കളി അവസാന നിമിഷത്തിലേക്കടുക്കവേയാണ് നേര്‍ വിപരീതമായി സെവിയ്യ വിജയ ഗോളും സ്വന്തമാക്കിയത്. 90ാം മിനുട്ടില്‍ പോസോ ആണ് അവസാന മിനുട്ടില്‍ സെവിയ്യക്ക് വിജയം സമ്മാനിച്ച ഗോള്‍ നേടിയത്.