മുംബൈ: പുനെ ടെസ്റ്റ് കഴിഞ്ഞതിന് പിന്നാലെ വിക്കറ്റ് കീപ്പര്‍ വൃദ്ധിമാന്‍ സാഹയെ പ്രശംസ കൊണ്ട് മൂടുകയായിരുന്നു ആരാധകര്‍. അപ്പോഴും ധോനിക്കൊപ്പം വരില്ലെന്ന വാക്കുകളുമായി ധോനി ആരാധകരുടെ മുറുമുറുപ്പ് പ്രകടമായിരുന്നു. സമകാലിക ക്രിക്കറ്റിലെ ഏറ്റവും മികച്ച വിക്കറ്റ് കീപ്പര്‍ ആര് എന്ന് സാഹയെ ചൂണ്ടിയുള്ള ഐസിസിയുടെ ചോദ്യം കൂടി വന്നതോടെ ധോനി ആരാധകര്‍ക്ക് അമര്‍ഷം അടക്കാനാവാതെയായി.
ഡുപ്ലസിസിനെ പുറത്താക്കാന്‍ സാഹ എടുത്ത തകര്‍പ്പന്‍ ക്യാച്ചിന്റെ ഫോട്ടോയാണ് ഐസിസി പങ്കുവെച്ചത്. സമകാലിക ക്രിക്കറ്റിലെ ഏറ്റവും മികച്ച വിക്കറ്റ് കീപ്പര്‍ ധോനി ആണെന്ന കമന്റുമായി ധോനി ആരാധകര്‍ നിറഞ്ഞു. ധോനി രാജ്യാന്തര ക്രിക്കറ്റില്‍ നിന്നും മാറി നില്‍ക്കുന്ന സാഹചര്യത്തില്‍ സാഹയുടെ പേര് ആരാധകര്‍ പറയുമെന്നാണ് ഐസിസി കരുതിയത്.
പക്ഷേ സാഹയെ നിലവിലെ ഏറ്റവും മികച്ച വിക്കറ്റ് കീപ്പര്‍ ആയി വിലയിരുത്തിക്കൊണ്ടുള്ള ഐസിസിയുടെ പോസ്റ്റ് ധോനി ആരാധകര്‍ക്ക് ഉള്‍ക്കൊള്ളാനായില്ല. കീപ്പര്‍മാര്‍ വരികയും പോവുകയും ചെയ്യും. എന്നാല്‍ എം എസ് ധോനി ഒന്നേയുണ്ടാവൂ എന്നൊണ് ആരാധകരുടെ വാക്കുകള്‍.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ