ചെന്നൈ: 2022ലും ധോനി ചെന്നൈ സൂപ്പര്‍ കിങ്‌സിനെ നയിക്കാന്‍ ഉണ്ടായേക്കുമെന്ന് സിഇഒ കാശി വിശ്വനാഥന്‍. ധോനിയെ സംബന്ധിച്ച് തങ്ങള്‍ക്ക് ആകുലതകള്‍ ഒന്നുമില്ലെന്നും ചെന്നൈ സിഇഒ പറഞ്ഞു. 

2020, 2021 ഐപിഎല്ലുകളില്‍ ധോനി ഞങ്ങളുമായി ഭാഗമാവുമെന്നാണ് പ്രതീക്ഷിക്കുന്നത്. 2022ലും. ജാര്‍ഖണ്ഡില്‍ ഇന്‍ഡോര്‍ നെറ്റ്‌സില്‍ ധോനി പരിശീലനം ആരംഭിച്ചതായുള്ള വിവരങ്ങള്‍ മാധ്യമങ്ങളില്‍ നിന്ന് അറിയാന്‍ കഴിഞ്ഞു. എന്നാല്‍ ഞങ്ങളുടെ ബോസിനെ സംബന്ധിച്ച് ഞങ്ങള്‍ക്ക് ആശങ്കകള്‍ ഏതുമില്ല. തന്റെ ഉത്തരവാദിത്വങ്ങളെ കുറിച്ച് ധോനിക്ക് വ്യക്തമായ ബോധ്യമുണ്ട്. സ്വന്തം കാര്യവും ടീമിന്റെ കാര്യവും ധോനി നോക്കിക്കോളം, ചെന്നൈ സൂപ്പര്‍ കിങ്‌സ് സിഇഒ പറഞ്ഞു. 

ഈ വര്‍ഷം ജനുവരിയില്‍ ധോനി ചെന്നൈയില്‍ തന്നെ വരും വര്‍ഷങ്ങളില്‍ തുടരുമെന്ന് എന്‍ ശ്രീനിവാസനും പറഞ്ഞിരുന്നു. ഈ വര്‍ഷം ധോനി കളിക്കും. അടുത്ത വര്‍ഷം ധോനിയുടെ പേര് ലേലത്തില്‍ വരികയും ധോനിയെ ഞങ്ങള്‍ നിലനിര്‍ത്തുകയും ചെയ്യും എന്നായിരുന്നു എന്‍ ശ്രീനിവാസന്റെ വാക്കുകള്‍. 

ആഗസ്റ്റ് 16ന് ടീം അംഗങ്ങള്‍ ചെന്നൈയില്‍ എത്തുമെന്ന് കാശി വിശ്വനാഥന്‍ പറഞ്ഞു. ആഗസ്റ്റ് 21നായിരിക്കും ചെന്നൈയിലേക്ക് പറക്കുക. ധോനി, റെയ്‌ന എന്നിവര്‍ ആഗസ്റ്റ് 14-15ടെ ചെന്നൈയില്‍ എത്തും. ഇടവേളക്ക് ശേഷം വരുന്നതിനാല്‍ ചെറിയ പരിശീലനങ്ങളിലൂടെയാവും ക്യാംപ് തുടങ്ങുക എന്നും സിഇഒ പറഞ്ഞു.