റോം: സീരി എ കിരീട പോരില്‍ തകര്‍പ്പന്‍ ജയത്തോടെ ലീഡ് ഉയര്‍ത്തി യുവന്റ്‌സ്. ക്രിസ്റ്റിയാനോയും ഡിബാലയും ഹിഗ്വെയ്‌നും ഗോള്‍ വല കുലുക്കിയതോടെ എതിരില്ലാത്ത നാല് ഗോളിനാണ് ലിച്ചെയെ യുവന്റ്‌സ് തകര്‍ത്തത്.
രണ്ടാം പകുതിയിലാണ് യുവന്റ്‌സിന്റെ നാല് ഗോളുകളും പിറന്നത്. 53ാം മിനിറ്റില്‍ തകര്‍പ്പന്‍ ഷോട്ടിലൂടെ ഡിബാലയും, 62ാം മിനിറ്റില്‍ പെനാല്‍റ്റിയിലൂടെ ക്രിസ്റ്റ്യാനോയും, 83ാം മിനിറ്റില്‍ ഹിഗ്വെയ്‌നും, 85ാം മിനിറ്റില്‍ ഡെ ലിജ്റ്റും ഗോള്‍ വല കുലുക്കി.
ആദ്യ പകുതിയുടെ 31ാം മിനിറ്റില്‍ ഫോബിയോ ചുവപ്പുകാര്‍ഡ് കണ്ട് പുറത്ത് പോയത് ലിച്ചെയ്ക്ക് ഇരട്ടി പ്രഹരമായി. ലുകാ റൊസെറ്റിനിയുടെ ഫൗളിലാണ് യുവന്റ്‌സിന് പെനാല്‍റ്റി ലഭിച്ചത്. പെനാല്‍റ്റിക്ക് പുറമെ രണ്ട് ഗോളുകള്‍ക്കും ക്രിസ്റ്റിയാനോ വഴിയൊരുക്കി. 83ാം മിനിറ്റില്‍ ക്രിസ്റ്റിയാനോയുടെ ബാക്ക് ഹീല്‍ പാസില്‍ നിന്നാണ് ഹിഗ്വെയ്ന്‍ ഗോള്‍വല കുലുക്കിയത്.
പോയിന്റ് ടേബിളില്‍ 28 കളിയില്‍ നിന്ന് 22 ജയത്തോടെ 69 പോയിന്റുമായാണ് യുവന്റ്‌സ് ഒന്നാമത് നില്‍ക്കുന്നത്. രണ്ടാം സ്ഥാനത്തുള്ള ലാസിയോക്കുള്ളത് 27 കളിയില്‍ നിന്ന് 62 പോയിന്റ്.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ