പനാജി : കോവിഡ് ആശങ്കകള്‍ മാറ്റിവെച്ച് ഇനി കാല്‍പ്പന്തുകളിയുടെ ആരവത്തിലേക്ക്. ഐഎസ്എല്‍ ഫുട്‌ബോള്‍ ഏഴാം സീസണ് ഇന്ന് ഗോവയില്‍ തുടക്കമാകും. ഉദ്ഘാടന മത്സരത്തില്‍ കേരള ബ്ലാസ്‌റ്റേഴ്‌സ് കരുത്തരായ എടികെ മോഹന്‍ ബഗാനെ നേരിടും. രാത്രി 7.30 നാണ് കിക്കോഫ്. 

ഗോവയിലെ മൂന്നു വേദികളിലായിട്ടാണ് മല്‍സരം നടക്കുക. കോവിഡ് പശ്ചാത്തലത്തില്‍ കാണികള്‍ക്ക് പ്രവേശനമില്ല. ഐ ലീഗില്‍നിന്ന് ഈസ്റ്റ് ബംഗാള്‍കൂടി എത്തിയതോടെ ഇത്തവണ 11 ടീമുകളാണ് മാറ്റുരയ്ക്കുന്നത്. നിലവിലെ ജേതാക്കളായ എടികെയും ഐ ലീഗ് ജേതാക്കളായ മോഹന്‍ ബഗാനും തമ്മില്‍ ലയിച്ച് എടികെ മോഹന്‍ ബഗാനായിട്ടാണ് ഈ സീസണ്‍ ഐഎസ്എലില്‍ ബൂട്ട് കെട്ടുന്നത്. 

ഫൈനലും സെമിയും ഉള്‍പ്പെടെ ലീഗില്‍ ആകെ 115 മത്സരങ്ങള്‍ ഉണ്ടാകും. ലീഗ് റൗണ്ടില്‍ ഓരോ ടീമും 2 തവണ ഏറ്റുമുട്ടും; ഓരോ ടീമിനും 20 മത്സരങ്ങള്‍ വീതം. ലീഗ് റൗണ്ട് പൂര്‍ത്തിയാകുമ്പോള്‍ പോയിന്റ് പട്ടികയില്‍ ആദ്യ 4 സ്ഥാനങ്ങളില്‍ നില്‍ക്കുന്നവര്‍ സെമിയിലേക്കു യോഗ്യത നേടും.