ടോക്യോ: ബോക്സിങ് റിങിൽ നിന്ന് മറ്റൊരു മെഡൽ എന്ന ഇന്ത്യയുടെ പ്രതീക്ഷകൾക്ക് തിരിച്ചടി. വനിതകളുടെ 75 കിലോഗ്രാം മിഡിൽവെയ്റ്റിൽ പൂജാ റാണി ക്വാർട്ടർ ഫൈനലിൽ തോറ്റു പുറത്തായി. ലോക രണ്ടാം നമ്പർ താരമായ ചൈനയുടെ ലീ ക്വിയാങിനോട് ഒന്നു പൊരുതാൻ പോലും ഇന്ത്യൻ താരത്തിന് കഴിഞ്ഞില്ല. സ്‌കോർ: 5-0.

റിയോ ഒളിമ്പിക്‌സിലെ വെങ്കല മെഡൽ ജേതാവായ ചൈനീസ് താരം മൂന്ന് റൗണ്ടിലും വ്യക്തമായ മുൻതൂക്കം നേടി. അൾജീരിയയുടെ ഐചർക് ചിയാബിനെ തോൽപ്പിച്ചാണ് പൂജ ക്വാർട്ടറിലെത്തിയത്. ക്വാർട്ടറിൽ പക്ഷേ താരത്തിന് മികവ് പുലർത്താൻ സാധിക്കാതെ പോയി.

നേരത്തെ വനിതകളുടെ 69 കിലോഗ്രാം വിഭാഗത്തിൽ ഇന്ത്യയുടെ ലവ് ലിന ബോർഗോഹെയ്ൻ സെമിയിലെത്തിയിരുന്നു. ക്വാർട്ടറിൽ ചൈനീസ് തായ്പെയ് താരം ചെൻ നിൻ ചിന്നിനെ തകർത്തായിരുന്നു (4-1) ലവ് ലിനയുടെ മുന്നേറ്റം. നാലാം സീഡും മുൻ ലോക ചാമ്പ്യനുമായ താരത്തെയാണ് 23കാരിയായ ലവ് ലിന പരാജയപ്പെടുത്തിയത്.