ലണ്ടൻ: പഴയ ട്വീറ്റകൾ പൊങ്ങിവരുന്നതോടെ കൂടുതൽ ഇം​ഗ്ലണ്ട് താരങ്ങൾ വിവാദത്തിൽ. വംശിയ, ലൈം​ഗിക അധിക്ഷേപ ട്വീറ്റുകളുടെ പേരിൽ ഒലെ റോബിൻസന് ടീമിലെ സ്ഥാനം നഷ്ടമായതിന് പിന്നാലെ പകരക്കാരനായെത്തിയ ഡോം ബെസിന്റെ പഴയ ഇൻസ്റ്റ​ഗ്രാം പോസ്റ്റുകളും വീണ്ടും വിവാദം ഉയർത്തി എത്തി. ഇതിന് പിന്നാലെ ഇം​ഗ്ലണ്ട് ക്യാപ്റ്റൻ മോർ​ഗൻ, ബട്ട്ലർ എന്നിവരുടെ പഴയ ട്വീറ്റുകളാണ് ഉയർന്ന് വരുന്നത്. 

ഇന്ത്യക്കാരെ അധിക്ഷേപിച്ചുള്ള മോർ‌​ഗന്റേയും ബട്ട്ലറുടേയും ട്വീറ്റുകളിൽ ഇം​ഗ്ലണ്ട് ക്രിക്കറ്റ് ബോർഡ് അന്വേഷണം നടത്തുന്നതായി ടെലി​ഗ്രാഫ് റിപ്പോർട്ട് ചെയ്യുന്നു. 2018 മെയ് 18ലെ ട്വീറ്റിൽ ബട്ട്ലറെ അഭിനന്ദിക്കുമ്പോഴാണ് മോർ​ഗൻ സർ എന്ന വാക്ക് ഉപയോ​ഗിച്ചത്. അന്ന് രാജസ്ഥാൻ റോയൽസിന് വേണ്ടി 53 പന്തിൽ ബട്ട്ലർ 94 റൺസ് നേടിയിരുന്നു. 

ഇതിന് അടിയിൽ വന്ന് മുൻ കിവീസ് ക്യാപ്റ്റൻ ബട്ട്ലറും കമന്റ് ചെയ്തു. ​ഗ്രാമർ തെറ്റിയ ഇം​ഗ്ലീഷ് ചൂണ്ടിയായിരുന്നു ഇവിടെ മക്കല്ലത്തിന്റെ കമന്റ്. ഇത് വ്യാപകമായി പ്രചരിച്ചതോടെ ബട്ട്ലർ ട്വീറ്റ് ഡിലീറ്റ് ചെയ്തു. അന്വേഷണത്തിന് ശേഷമാവും മോർ​ഗനും ബട്ട്ലർക്കും എതിരായ നടപടിയിൽ ഇം​ഗ്ലണ്ട് ക്രിക്കറ്റ് ബോർഡ് തീരുമാനമെടുക്കുക. 

ഒലെ റോബിൻസനിന്റെ സസ്പെൻഷനോടെയാണ് മോർ‌​ഗന്റേയും ബട്ട്ലറുടേയും ട്വീറ്റുകൾ വീണ്ടും ഉയർന്നു വന്നത്. 2012 മുതൽ 2014 വരെയുള്ള റോബിൻസണിന്റെ ട്വീറ്റുകളാണ് താരത്തിന്റെ ടെസ്റ്റ് അരങ്ങേറ്റത്തിന് പിന്നാലെ ഉയർന്ന് വന്നത്. രാജ്യാന്തര ക്രിക്കറ്റിൽ നിന്ന് സസ്പെൻഷൻ നേരിടുകയാണെങ്കിലും ഡൊമസ്റ്റിക് ക്രിക്കറ്റിൽ സസെക്സിനെതിരെ റോബിൻസൻ കളി തുടരും.