ദുബായ്: ഐപിഎല്‍ 14ാം സീസണില്‍ ഏറ്റവും കൂടുതല്‍ റണ്‍സ് നേടുന്ന താരത്തിനുള്ള ഓറഞ്ച് ക്യാപ്പ് ചെന്നൈ സൂപ്പര്‍ കിങ്‌സ് താരം ഋതുരാജ് ഗെയ്ക്‌വാദെക്ക്. ഐപിഎല്ലില്‍ ഓറഞ്ച് ക്യാപ്പ് സ്വന്തമാക്കുന്ന ഏറ്റവും പ്രായം കുറഞ്ഞ താരമെന്ന റെക്കോഡ് ഇനി ഋതുരാജിന് സ്വന്തം. 

രാഹുലിനെ മറികടന്ന് റണ്‍വേട്ടയില്‍ ഒന്നാമന്‍

സീസണില്‍ 15 മത്സരങ്ങളില്‍ നിന്നായി ഒരു സെഞ്ചുറിയും നാല് അര്‍ധ സെഞ്ചുറികളുമടക്കം 46.38 ശരാശരിയില്‍ 603 റണ്‍സടിച്ചുകൂട്ടിയ ഋതുരാജ് ഫൈനലില്‍ 24 റണ്‍സ് നേടിയാല്‍ ഓറഞ്ച് ക്യാപ്പ് എന്ന നേട്ടത്തിലെത്തുമായിരുന്നു. കലാശപ്പോരാട്ടത്തില്‍ 16 ബോളില്‍ താരം ഓറഞ്ച് ക്യാപ്പ് നേട്ടത്തിലെത്തി. 13 കളികളില്‍ നിന്ന് 626 റണ്‍സുമായി പഞ്ചാബ് കിങ്‌സിന്റെ കെ എല്‍ രാഹുലിനെ മറികടന്നാണ് ചെന്നൈ ഓപ്പണര്‍ നേട്ടം സ്വന്തം പേരിലാക്കിയത്. 

ഷോണ്‍ മാര്‍ഷിന്റെ റെക്കോര്‍ഡ് ഇനി ഋതുരാജിന് 

ഐപിഎല്ലില്‍ ഓറഞ്ച് ക്യാപ്പ് നേടുന്ന പ്രായം കുറഞ്ഞ താരമെന്ന റെക്കോര്‍ഡ് ഇതുവരെ മുന്‍ കിങ്‌സ് ഇലവന്‍ പഞ്ചാബ് (ഇപ്പോഴത്തെ പഞ്ചാബ് കിങ്‌സ്) താരം ഷോണ്‍ മാര്‍ഷിന്റെ പേരിലായിരുന്നു. 2008 സീസണില്‍ പഞ്ചാബിനായി 616 റണ്‍സ് സ്‌കോര്‍ ചെയ്യുമ്പോള്‍ 25 വയസായിരുന്നു താരത്തിന്റെ പ്രായം.