ലണ്ടൻ: ഇംഗ്ലീഷ് പ്രീമിയർ ലീഗിൽ ഇന്നലെ നടന്ന മത്സരത്തിൽ ലിവർപൂളിന് വമ്പൻ ജയം. ലീഡ്‌സ് യുണൈറ്റഡിനെ മറുപടിയില്ലാത്ത മൂന്നു ഗോളുകൾക്കാണ് ചെമ്പട തകർത്തത്. മുഹമ്മദ് സല, ഫാബീന്യോ, സാദിയോ മാനെ എന്നിവരാണ് ലിവർപൂളിനായി ​ഗോൾ നേടിയത്. ലിവർപൂളിനായി സലയുടെ 100-ാം ഗോളാണ് മത്സരത്തിൽ പിറന്നത്. 

പ്രീമിയര്‍ ലീഗില്‍ 100 ഗോള്‍ തികയ്ക്കുന്ന 30-ാമത്തെ താരമാണ് സല. കളിയുടെ 20-ാം മിനിറ്റിലായിരുന്നു സലയുടെ ഗോള്‍.

മത്സരത്തിനിടെ ലിവർപൂളിന്റെ യുവതാരം ഹാർവി എലിയട്ട് ഗുരുതരമായി പരിക്കേറ്റ് പുറത്തായി. ലീഡ്‌സിന്റെ പ്രതിരോധതാരം പാസ്‌കൽ സ്ട്രൂയിക്കിന്റെ ഗുരുതരമായി ഫൗൾ ആണ് എലിയട്ടിന് വിനയായത്. മത്സരത്തിന്റെ 58-ാം മിനിട്ടിലാണ് സംഭവം. പാസ്‌കലുമായുള്ള കൂട്ടിയിടിയിൽ കണങ്കാലിന്റെ സ്ഥാനം തെറ്റി ഗ്രൗണ്ടിൽ മുട്ടിടിച്ച് വീഴുകയായിരുന്നു എലിയട്ട്. ഉടൻ തന്നെ ആശുപത്രിയിലെത്തിച്ചു ശസ്ത്രക്രിയയ്ക്ക് വിധേയനാക്കി. 

ലീഗിൽ നാലു കളികൾ സമാപിച്ചപ്പോൾ യുണൈറ്റഡും ചെൽസിയും 10 പോയന്റുമായി ഒന്നും രണ്ടും സ്ഥാനത്താണ്. ലിവർപൂൾ മൂന്നാം സ്ഥാനത്താണ്.