മോസ്‌ക്കോ: പ്രവചനങ്ങളെ അട്ടിമറിച്ച ഗ്രൂപ്പ് എച്ചില്‍ ഇന്ന് പോളണ്ട്- കൊളംബിയ ടീമുകള്‍ നേര്‍ക്കുനേര്‍. ആദ്യ മത്സരത്തില്‍ വിജയം സ്വന്തമാക്കിയ ജപ്പാന്‍- സെനഗല്‍ ടീമുകളും ഇന്ന് മുഖാമുഖം വരും. രണ്ട് അട്ടിമറികളാണ് ഗ്രൂപ്പ് എച്ചിനെ ശ്രദ്ധേയമാക്കിയത്. ആദ്യ മത്സരത്തില്‍ ജപ്പാന്‍- കൊളംബിയയേയും സെനഗല്‍- പോളണ്ടിനേയും 2-1ന് പരാജയപ്പെടുത്തിയിരുന്നു. സെനഗല്‍- ജപ്പാന്‍ മത്സരത്തിലെ വിജയികള്‍ പ്രീ ക്വാര്‍ട്ടര്‍ ഉറപ്പിക്കുമ്പോള്‍ പോളണ്ട്- കൊളംബിയ ടീമുകള്‍ക്ക് ടൂര്‍ണമെന്റില്‍ നിലനില്‍ക്കാനുള്ള അവസാന കച്ചിത്തുരുമ്പാണ് മത്സരം. ഈ മത്സരത്തില്‍ വിജയിക്കുന്നവര്‍ പ്രീ ക്വാര്‍ട്ടര്‍ പ്രതീക്ഷ കാക്കും. പരാജയപ്പെടുന്നവര്‍ക്ക് ഗുഡ് ബൈ  പറയാം. രാത്രി 8.30നാണ് ജപ്പാന്‍- സെനഗല്‍ മത്സരം. രാത്രി 11.30നാണ് പോളണ്ട്-  കൊളംബിയ പോരാട്ടം. 
പരുക്കില്‍ നിന്ന് മുക്തനായി ഹാമിഷ് റോഡ്രിഗസ് ആദ്യ ഇലവനിലേക്ക് തിരിച്ചെത്തുന്നത് കൊളംബിയക്ക് ആശ്വാസം നല്‍കും. സെനഗലിനെതിരേ ചുവപ്പുകാര്‍ഡ് കണ്ട കാര്‍ലോസ് സാഞ്ചസിന് പകരം വില്‍മര്‍ ബാരിയോസും മുന്നേറ്റത്തില്‍ ഫാല്‍ക്കോവയും കളിക്കും.