തിരുവനന്തപുരം: സിപിഐയുടെ കടുത്ത നിലപാടിനെത്തുടര്‍ന്നാണ് തനിക്കു രാജി വയ്‌ക്കേണ്ടി വന്നതെന്ന് ഗതാഗതമന്ത്രിസ്ഥാനം ഒഴിഞ്ഞ തോമസ് ചാണ്ടി. ഒരു ഘടക കക്ഷി കടുത്ത നിലപാടെടുത്ത സാഹര്യത്തില്‍ ഒന്നുകൂടി ആലോചിക്കാന്‍ മുഖ്യമന്ത്രി തന്നോട് ആവശ്യപ്പെട്ടു. ഇതിനെത്തുടര്‍ന്ന് എന്‍സിപി ദേശീയ നേതൃത്വത്തോട് കൂടിയാലോചന നടത്തിയാണ് രാജിക്കത്ത് ഒപ്പിട്ടു നല്‍കിയതെന്ന് തോമസ് ചാണ്ടി പറഞ്ഞു.

രാജി വയ്ക്കാന്‍ ഉദ്ദേശിച്ചിരുന്നില്ല. അതിനുള്ള സാഹചര്യം ഇല്ലായിരുന്നു. താന്‍ പങ്കെടുക്കുന്ന മന്ത്രിസഭാ യോഗത്തില്‍ പങ്കെടുക്കില്ലെന്ന് സിപിഐ നിലപാടെടുത്തു. രാജിവയ്ക്കാന്‍ തങ്ങള്‍ ആവശ്യപ്പെടുന്നില്ലെന്നാണ് മുഖ്യമന്ത്രി തന്നോടു പറഞ്ഞത്. പാര്‍ട്ടി നേതൃത്വത്തോടു സംസാരിച്ച് വേണ്ട തീരുമാനമെടുക്കാനാണ് മുഖ്യമന്ത്രി പറഞ്ഞത്. തുടര്‍ന്ന് ശരദ് പവാറിനോടും പ്രഫുല്‍ പട്ടേലിനോടും സംസാരിച്ചാണ് രാജിക്കത്ത് ഒപ്പിട്ടു നല്‍കിയതെന്ന് തോമസ് ചാണ്ടി വിശദീകരിച്ചു.

മന്ത്രിസ്ഥാനം എന്‍സിപിക്കു തന്നെ നല്‍കുമെന്ന് മുഖ്യമന്ത്രി വ്യക്തമാക്കിയിട്ടുണ്ട്. നിലവില്‍ മന്ത്രിസ്ഥാനം ഒഴിച്ചിടും. ആരാപണങ്ങളില്‍ കുറ്റവിമുക്തരായി താനോ ശശീന്ദ്രനോ, ആരാണോ ആദ്യമെത്തുന്നത് അയാള്‍ക്കു മന്ത്രിസ്ഥാനം ലഭിക്കും. ഇക്കാര്യത്തില്‍ മുഖ്യമന്ത്രി ഉറപ്പുനല്‍കിയിട്ടുണ്ടെന്ന് തോമസ് ചാണ്ടി പറഞ്ഞു.