ന്യൂഡല്‍ഹി: പ്രളയദുരിതം നേരിടുന്ന കേരളത്തിലേക്ക് യാത്ര വേണ്ടെന്ന് അമേരിക്കന്‍ പൗരന്മാര്‍ക്ക് മുന്നറിയിപ്പ്. കേരളത്തിലേക്കുള്ള യാത്ര ഇപ്പോൾ വേണ്ടെന്നാണ് മുന്നറിയിപ്പ് നൽകിയിട്ടുള്ളത്. വ്യാഴാഴ്ചയാണ് യു എസ് പൗരന്മാർക്ക് അമേരിക്കന്‍ അധികൃതര്‍ നിര്‍ദേശം നല്‍കിയത്. കാലവര്‍ഷം ശക്തമായതും മണ്ണിടിച്ചില്‍ ഉണ്ടായതും ചൂണ്ടിക്കാട്ടിയാണ് അപകടമേഖലയിലേക്ക് യാത്ര ചെയ്യരുതെന്ന നിര്‍ദേശം നല്‍കിയത്. 

കനത്ത പേമാരിയിലും മണ്ണിടിച്ചിലിലും 24 പേരാണ്  മരിച്ചത്. വെള്ളം നിറഞ്ഞതിനെ തുടർന്ന് സംസ്ഥാനത്തെ 24 ഡാമുകളാണ് തുറന്നത്. പ്രശ്‌നം അതിഗുരുതരമാണെന്നാണ് മുഖ്യമന്ത്രി പിണറായി വിജയന്‍ വിശേഷിപ്പിച്ചത്. ജലനിരപ്പ് ഉയർന്നതിനെ തുടർന്ന് ഇടുക്കി ഡാമിന്റെ രണ്ട് ഷട്ടറുകളും കൂടി ഇന്ന് രാവിലെ തുറന്നു. ഇന്നലെ ഉച്ചയോടെ ചെറുതോണിയിലെ മധ്യഭാ​ഗത്തെ ഷട്ടർ തുറന്നിരുന്നു.