ഹരിപ്പാട്: ന്യൂനപക്ഷമായിരുന്നിട്ടും ലത്തീന്‍ കത്തോലിക്കാ സഭയുടെ കൂട്ടായ്മയ്ക്കു മുന്നില്‍ ഉരുക്കു മനുഷ്യനായ പിണറായി വിജയന്‍പോലും നട്ടെല്ല് വളച്ചെന്ന് എസ്എന്‍ഡിപി യോഗം ജനറല്‍ സെക്രട്ടറി വെള്ളാപ്പള്ളി നടേശന്‍. ഓഖി ദുരന്തവുമായി ബന്ധപ്പെട്ട നഷ്ടപരിഹാരങ്ങള്‍ നേടിയെടുക്കാന്‍ ലത്തീന്‍ കത്തോലിക്കാ സഭയുടെ കൂട്ടായ്മ കണ്ടുപഠിക്കണമെന്നും വെള്ളാപ്പള്ളി അഭിപ്രായപ്പെട്ടു.
ഇപ്പോള്‍ ജനപ്രതിനിധികള്‍ അവരവരുടെ സമുദായങ്ങള്‍ക്കു വേണ്ടി മാത്രമാണ് പ്രവര്‍ത്തിക്കുന്നതെന്ന് വെള്ളാപ്പള്ളി കുറ്റപ്പെടുത്തി. എസ്എന്‍ഡിപി യോഗം ഹരിപ്പാട് ടൗണ്‍ ശാഖാ ക്ഷേത്രത്തിലെ പഞ്ചലോഹ വിഗ്രഹ പ്രതിഷ്ഠയോട് അനുബന്ധിച്ചു നടന്ന പൊതുസമ്മേളനം ഉദ്ഘാടനം ചെയ്യുകയായിരുന്നു അദ്ദേഹം.
എംപി ഫണ്ടും എംഎല്‍എ ഫണ്ടും എങ്ങനെ പങ്കിട്ടെന്ന് വിവരാവകാശം കൊടുത്താല്‍ മനസിലാവുമെന്ന് വെള്ളാപ്പള്ളി ചൂണ്ടിക്കാട്ടി. തിരഞ്ഞെടുപ്പ് അടുക്കുമ്പോള്‍ തോളത്ത് കൈയിട്ട് ചിരിച്ചുകാണിക്കുന്നവര്‍ക്ക് വോട്ടു ചെയ്യുന്നവരായി ഈഴവര്‍ മാറി. ഈ രീതി മാറി ഈഴവര്‍ വോട്ടുബാങ്കായി മാറിയാല്‍ മാത്രമേ സാമൂഹിക നീതി നേടിയെടക്കാന്‍ കഴിയൂ- വെള്ള്ാപ്പള്ളി അഭിപ്രായപ്പെട്ടു.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ