കൊച്ചി: നടന്‍ ദിലീപിനെ അമ്മയിലേക്ക് തിരിച്ചെടുത്തതുമായി ബന്ധപ്പെട്ട് താരസംഘടനയ്‌ക്കെതിരെ പോര്‍മുഖം തുറന്ന ഡബ്ല്യൂസിസിയ്ക്ക് പിന്തുണയുമായി നടന്‍ കമല്‍ഹാസന്‍. ചലച്ചിത്ര വനിതാ പ്രവര്‍ത്തകരുടെ കൂട്ടായ്മയായ ഡബ്ല്യൂസിസി ഉയര്‍ത്തുന്ന നിലപാടുകളെ പിന്തുണയ്ക്കുന്നു. അമ്മ ചര്‍ച്ച ചെയ്തുവേണമായിരുന്നു ദിലീപിനെ തിരിച്ചെടുക്കേണ്ടിയിരുന്നതെന്നും ഓര്‍മ്മിപ്പിച്ച കമല്‍ഹാസന്‍ താരസംഘടന എതിരഭിപ്രായങ്ങളെ മാനിക്കണമായിരുന്നുവെന്നും ചൂണ്ടിക്കാട്ടി.
കഴിഞ്ഞ ദിവസം ദിലീപിനെ തിരിച്ചെടുത്തത് വിവാദമായ പശ്ചാത്തലത്തില്‍ വിശദീകരണവുമായി അമ്മ പ്രസിഡന്റ് മോഹന്‍ ലാല്‍ രംഗത്തുവന്നിരുന്നു. വാര്‍ത്താസമ്മേളനത്തില്‍ മോഹന്‍ ലാല്‍ ഉന്നയിച്ച പല കാര്യങ്ങളും വാസ്തവ വിരുദ്ധമാണെന്ന് ചൂണ്ടിക്കാട്ടി അമ്മ പ്രസിഡന്റിനെതിരെ ഡബ്ല്യൂസിസി പ്രതികരിച്ചിരുന്നു. നടന്‍ ദീലിപ് അവസരങ്ങള്‍ നിഷേധിക്കുന്നുവെന്ന് ആക്രമിക്കപ്പെട്ട നടി രേഖാമൂലം പരാതി നല്‍കിയില്ല എന്നത് ഉള്‍പ്പെടെ മോഹന്‍ലാല്‍ വാര്‍ത്താസമ്മേളനത്തില്‍ പറഞ്ഞ പല കാര്യങ്ങളിലും ഡബ്ല്യൂസിസി പ്രതിഷേധം രേഖപ്പെടുത്തി. ഇതിന് പിന്നാലെയാണ് ഡബ്ല്യൂസിസിക്ക് പിന്തുണയുമായി കമല്‍ഹാസന്‍ രംഗത്തുവന്നത്.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ