കൊച്ചി: സിപിഎം എറണാകുളം ജില്ലാ സെക്രട്ടറിയായി സിഎന്‍ മോഹനനെ തെരഞ്ഞെടുത്തു. നിലവിലെ സെക്രട്ടറി പി രാജീവ് സംസ്ഥാന സെക്രട്ടേറിയറ്റ് അംഗമാവുന്ന ഒഴിവിലാണ് പുതിയ സെക്രട്ടറിയെ തെരഞ്ഞെടുത്തത്.
സിപിഎം സംസ്ഥാന കമ്മിറ്റി അംഗമായ സിഎന്‍ മോഹനന്‍ ജിസിഡിഎ ചെയര്‍മാനാണ്. ജില്ലയില്‍നിന്നുള്ള മുതിര്‍ന്ന സംസ്ഥാന കമ്മിറ്റി അംഗങ്ങളില്‍ ഒരാളായ മോഹനന്‍ ഏറെക്കാലം ദേശാഭിമാനി കൊച്ചി യൂണിറ്റ് മാനേജര്‍ ആയിരുന്നു.
സിഎന്‍മോഹനന് ഒപ്പം മുന്‍ ജില്ലാ സെക്രട്ടറി ഗോപി കോട്ടമുറിക്കലിന്റെ പേരും പുതിയ ജില്ലാ സെക്രട്ടറിയായി പരിഗണിച്ചിരുന്നു. മുമ്പ് മൂന്നു തവണ ജില്ലാ സെക്രട്ടറിയായിരുന്ന കോട്ടമുറിക്കലിനെ വീണ്ടും നിയമിക്കുന്നത് നിലവിലെ മാനദണ്ഡങ്ങള്‍ക്കു വിരുദ്ധമാവമെന്ന വിലയിരുത്തലിലാണ് സിഎന്‍ മോഹനന്റെ തെരഞ്ഞെടുപ്പ്.
സിഎന്‍ മോഹനന്‍ ജില്ലാ സെക്രട്ടറിയാവുന്നതോടെ ജിസിഡിഎയ്ക്കു പുതിയ മേധാവിയെ കണ്ടെത്തേണ്ടി വരും. മുതിര്‍ന്ന നേതാവ് സിഎന്‍ ദിനേശ് മണിയെ ഈ സ്ഥാനത്തേക്കു പരിഗണിക്കുമെന്ന് സൂചനകളുണ്ട്.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ