ചെങ്ങന്നൂര്‍: മൈക്രോ ഫിനാന്‍സ് തട്ടിപ്പ് കേസില്‍ എസ്എന്‍ഡിപി യോഗം ജനറല്‍ സെക്രട്ടറി വെള്ളാപ്പള്ളി നടേശനും മകന്‍ തുഷാര്‍ വെള്ളാപ്പള്ളിക്കുമെതിരെ എഫ്‌ഐആര്‍ രജിസ്റ്റര്‍ ചെയ്തു.ചെങ്ങന്നൂര്‍ പൊലീസാണ് കേസെടുത്തിരിക്കുന്നത്. ഇവര്‍ രണ്ടുപേരുമുള്‍പ്പെടെ കേസില്‍ ഏഴ് പ്രതികളാണുള്ളത്. എസ്എന്‍ഡിപി യോഗം സംരക്ഷണ സമിതിയുടെ ഹര്‍ജി പരിഗണിച്ചുകൊണ്ട് കേസെടുക്കണമെന്ന് നേരത്തെ ചെങ്ങന്നൂര്‍ ഒന്നാംക്ലാസ് മജിസ്‌ട്രേറ്റ് കോടതി ഉത്തരവിട്ടിരുന്നു.
പിന്നോക്ക ക്ഷേമ കോര്‍പ്പറേഷന്‍ എംഡി എന്‍ നജീബിനെ കേസില്‍ നിന്ന് ഒഴിവാക്കിയിരുന്നു. മൈക്രോ ഫിനാന്‍സിലെ വിവിധ സംഘങ്ങള്‍ക്കായി പിന്നോക്ക വികസന കോര്‍പ്പറേഷനില്‍ നിന്നെടുത്ത 15 കോടി രൂപയില്‍ ക്രമക്കേട് നടന്നെന്നാണ് പരാതി.
അഞ്ച് ശതമാനം പലിശയ്ക്ക് നല്‍കേണ്ട വായ്പ 12 മുതല്‍ 18 ശതമാനം വരെ പലിശയിലാണ് വിതരണം ചെയ്തതെന്ന് കോടതി നേരത്തെ കണ്ടെത്തിയിരുന്നു. പിന്നോക്ക വികസന കോര്‍പറേഷനിലെ മൈക്രോ ഫിനാന്‍സ് അഴിമതി അന്വേഷിക്കണമെന്നുള്ള വിഎസ് അച്യുതാനന്ദന്റെ ആവശ്യത്തിന്‍മേല്‍ നേരത്തെ വിജിലന്‍സും വെള്ളാപ്പള്ളിക്ക് എതിരെ അന്വേഷണം പ്രഖ്യാപിച്ചിരുന്നു.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ