ആലപ്പുഴ: 'തന്നോടൊന്ന് ഫോൺ ചെയ്യാനല്ലേ പറഞ്ഞത്. ഇങ്ങോട്ട് ഓടിവരാൻ ഞാൻ പറഞ്ഞില്ലല്ലോ' എന്ന് കെ ആർ ​ഗൗരിയമ്മ. ചാത്തനാട് കളത്തിപ്പറമ്പിൽ വീട്ടിലെത്തിയ മന്ത്രി തോമസ് ഐസക്കിനോടായിരുന്നു ​ഗൗരിയമ്മയുടെ ശുണ്ഠി. ​ഗൗരിയമ്മയുടെ   'സ്വീകരണ'രീതി അറിയാമായിരുന്ന മന്ത്രി പതിവ് പുഞ്ചിരിയോടെ ​ഗൗരിയമ്മയുടെ അരികത്തിരുന്നു.

ഇന്നലെയാണ് മന്ത്രി തോമസ് ഐസക് ഗൗരിയമ്മയുടെ വസതിയിൽ സൗഹൃദ സന്ദർശനത്തിനെത്തിയത്.  കഴിഞ്ഞ ദിവസം ഗൗരിഅമ്മ സഹായി മുഖേന മന്ത്രിയെ വിളിച്ച് തന്നെയൊന്ന് ഫോണിൽ വിളിക്കണമെന്ന് ആവശ്യപ്പെട്ടിരുന്നു. ഇതു പ്രകാരമാണ് മന്ത്രി ​ഗൗരിയമ്മയുടെ അരികത്തെത്തിയത്. 

'ഇനിയെന്താണ് അടുത്ത യോഗം? ശുണ്ഠി തണുത്തപ്പോൾ ഗൗരിഅമ്മയുടെ അടുത്ത ചോദ്യമിതായിരുന്നു. 'ശബരിമലയെ കുറിച്ചു ജില്ലാ കമ്മിറ്റിയിൽ പാർട്ടി പ്രാസംഗികർക്ക് ക്ലാസുണ്ട്'- മന്ത്രി പറഞ്ഞു. എന്നാല്‍ അധികം വൈകേണ്ട, താൻ വേഗം ചെല്ല്... ​ഗൗരിയമ്മ മന്ത്രിയെ യാത്രയാക്കി. കൂടുതൽ കുശലം പറഞ്ഞു നിന്നാലുള്ള 'ഭവിഷ്യത്ത്' അറിയാമായിരുന്ന ധനമന്ത്രി ​ഗൗരിയമ്മയുടെ കരം ഗ്രഹിച്ച് യാത്ര പറഞ്ഞിറങ്ങി.