കൊല്ലം: സ്വദേശാഭിമാനി രാമകൃഷ്ണപിള്ളയെ വിമർശിക്കുന്ന പുസ്തകം സാഹിത്യ പ്രവർത്തക സഹകരണ സംഘം (എസ്പിസിഎസ്) രഹസ്യമായി പിൻവലിച്ചു. പുസ്തകശാലകളിൽ പ്രദർശിപ്പിക്കുകയോ വിൽക്കുകയോ ചെയ്യരുതെന്നാണ് വാക്കാലുള്ള നിർദേശം. കവി ഏഴാച്ചേരി രാമചന്ദ്രൻ പ്രസിഡന്റായ സംഘത്തിൽ ഇടതുപക്ഷ എഴുത്തുകാരാണ് ഏറെയുമുള്ളത്. 

മുൻ മാധ്യമപ്രവർത്തകൻ രാമചന്ദ്രൻ എഴുതിയ സ്വദേശാഭിമാനി - ക്ലാവു പിടിച്ച കാപട്യം എന്ന പുസ്തകമാണ് പിൻവലിച്ചത്. പ്രൊഫസർ എംകെ സാനുവാണ് അവതാരിക എഴുതിയത്. 

പുസ്തകം പ്രകാശനം ചെയ്തിട്ട് ഒരു വർഷത്തോളമായെങ്കിലും സമീപകാലത്താണ് പിൻവലിക്കാൻ തീരുമാനിച്ചത്. സ്വദേശാഭിമാനി രാമകൃഷ്ണപിള്ളയെ വിമർശിച്ചു ​ഗ്രന്ഥാലോകത്തിൽ രാമചന്ദ്രൻ എഴുതിയ ലേഖനം സിപിഎമ്മിന്റെ അപ്രീതിക്ക് കാരണമായിരുന്നു. ഇതേത്തുടർന്ന് എസ് രമേശന് എഡിറ്റർ സ്ഥാനം ഒഴിയേണ്ടി വന്നു. ഇതിന് പിന്നാലെയാണ് പുസ്തകം പിൻവലിച്ചത്.