നിലമ്പൂര്‍; ശബരിമല വിഷയത്തിലെ സംസ്ഥാന സര്‍ക്കാരിന്റെ നിലപാടിനെ വിമര്‍ശിച്ച ബിജെപി ദേശിയ അധ്യക്ഷന്‍ അമിത് ഷായ്‌ക്കെതിരേ മന്ത്രി എം.എം. മണി. അമിത് ഷാ അല്ല ആരു വിചാരിച്ചാലും കേരളത്തിന്റെ ഐക്യം തകര്‍ക്കാന്‍ പറ്റില്ലെന്നും ഉമ്മാക്കി കാണിച്ച് പേടിപ്പിക്കേണ്ടെന്നും അദ്ദേഹം പറഞ്ഞു. 

ഗുജറാത്ത്, യുപി, എന്നീ സംസ്ഥാനങ്ങളെപ്പോലെയാണ് കേരളമെന്ന് വിചാരിച്ചാണ് ജനകീയ സര്‍ക്കാരിലെ വലിച്ച് താഴെയിടുമെന്ന് അമിത് ഷാ പറയുന്നത്. അമിത് ഷായിലൂടെ പുറത്തുവരുന്നത് ആര്‍എസ്എസിന്റെ ശബ്ദമാണെന്നും അദ്ദേഹം കൂട്ടിച്ചേര്‍ത്തു. പ്രളയത്തില്‍ തകര്‍ന്ന കേരളത്തെ പുനഃര്‍നിര്‍മിക്കാനുള്ള സംസ്ഥാന സര്‍ക്കാരിന്റെ ശ്രമങ്ങളെ തടയാനാണ് കേന്ദ്രം നോക്കുന്നതെന്നും അദ്ദേഹം കുറ്റപ്പെടുത്തി. 31,000 കോടി രൂപ വേണ്ട സ്ഥാനത്ത് 600 കോടി മാത്രമാണ് കേന്ദ്രം നല്‍കിയതെന്നും മന്ത്രി പറഞ്ഞു.