തിരുവനന്തപുരം:  സ്കൂളുകളിൽ ഓണപ്പരീക്ഷയ്ക്കു പകരം ക്ലാസ് പരീക്ഷ നടത്താനും ക്രിസ്മസ് പരീക്ഷ മുൻ നിശ്ചയ പ്രകാരം നടത്താനും ക്വാളിറ്റി ഇംപ്രൂവ്മെന്റ് പ്രോഗ്രാം (ക്യുഐപി) മോണിറ്ററിങ് കമ്മിറ്റി യോഗം തീരുമാനിച്ചു. ഇതനുസരിച്ച് ഡിസംബർ 13 മുതൽ 22 വരെ ക്രിസ്മസ് പരീക്ഷ നടക്കും. ഓണപ്പരീക്ഷയ്ക്കു പകരം ഒക്ടോബർ 15ന് മുൻപായി സ്കൂൾതലത്തിൽ ചോദ്യക്കടലാസ് തയാറാക്കി ക്ലാസ് പരീക്ഷ നടത്തണം. ഓണപ്പരീക്ഷയ്ക്കായി തയാറാക്കിയ ചോദ്യക്കടലാസുകൾ ക്ലാസുകളിൽ ചർച്ച ചെയ്യണം.

എസ്എസ്എൽസി, ഹയർസെക്കൻഡറി പരീക്ഷ മുൻ തീരുമാനം അനുസരിച്ചു നടക്കും. എസ്എസ്എൽസി പരീക്ഷ രാവിലെയാക്കുന്നതിനെക്കുറിച്ച് ഹയർസെക്കൻഡറി, വിഎച്ച്എസ്ഇ, പരീക്ഷാഭവൻ സെക്രട്ടറിമാരുടെ യോഗം വിളിച്ചു തീരുമാനിക്കും.