തിരുവനന്തപുരം; പെരിന്തല്‍മണ്ണയില്‍ നിന്നുള്ള മൂന്ന് ദിവസം പ്രായമായ കുഞ്ഞിനെ തിരുവനന്തപുരം ശ്രീചിത്രയില്‍ എത്തിച്ചു. ഹൃദയസംബന്ധമായ ചികിത്സയ്ക്കായാണ് നവജാത ശിശുവിനെ ശ്രീചിത്രയിലേക്ക് മാറ്റിയത്. പെരുന്തല്‍മണ്ണയില്‍ നിന്ന് പുറപ്പെട്ട ആംബുലന്‍സ് അഞ്ച് മണിക്കൂര്‍കൊണ്ടാണ് ദൗത്യം പൂര്‍ത്തിയാക്കിയത്. ഹൃദയസംബന്ധമായ രോഗങ്ങളെ തുടര്‍ന്ന് ഗുരുതരാവസ്ഥയിലാണ് കുഞ്ഞ്. 

മലപ്പുറം ജില്ലയിലെ വേങ്ങൂര്‍ സ്വദേശിയായ കളത്തില്‍ നജാദ്  ഇര്‍ഫാന ദമ്പതികളുടെ കുഞ്ഞിനെയാണ് അടിയന്തിര ചികിത്സയ്ക്കായാണ് ശ്രീചിത്രയിലേക്ക് എത്തിച്ചത്. ആരോഗ്യമന്ത്രിയുടെ ഓഫീസ് ഇടപെട്ട് ഹൃദ്യം പദ്ധതിയുടെ ഭാഗമായാണ് ചികിത്സ ഒരുക്കിയിരിക്കുന്നത്. രണ്ട് ദിവസത്തിനിടെ രണ്ട് കുഞ്ഞു ജീവനുകള്‍ക്ക് വേണ്ടിയാണ് കേരളം വഴിമാറിയത്. 

ചൊവ്വാഴ്ച മംഗലാപുരത്തു നിന്നും ഇതേ സാഹചര്യത്തില്‍ 15 ദിവസം പ്രായമായ കുട്ടിയേയും കൊണ്ട് ആംബുലന്‍സ് തിരുവനന്തപുരത്തേക്ക് തിരിച്ചിരുന്നു. എന്നാല്‍ സര്‍ക്കാര്‍ ഇടപെട്ടതോടെ ചികിത്സ അമൃതയിലേക്ക് മാറ്റുകയായിരുന്നു. വലിയ പിന്തുണയാണ് പൊതുജനങ്ങളില്‍ നിന്നുണ്ടായത്.