കൊച്ചി: ഒന്നര മാസം മുൻപ് ബം​ഗളൂരുവിൽ നിന്ന് കാണാതായ മലയാളി യുവാവിന്റേയും യുവതിയുടേയും മൃതദേഹങ്ങൾ ജീർണിച്ച നിലയിൽ കണ്ടെത്തി. എറണാകുളം സ്വദേശികളായ അഭിജിത് മോഹനും ശ്രീലക്ഷ്മിയുമാണ് മരിച്ചത്. ഹെബ്ബഗോഡി പൊലീസ് സ്റ്റേഷന്‍ പരിധിയിലുള്ള വന മേഖലയില്‍ ജീര്‍ണിച്ച നിലയിലാണ് മൃതദേഹങ്ങള്‍ കണ്ടെത്തിയത്. യുവാവിന്റെ തല ശരീരത്തിൽ നിന്ന് വേർപെട്ട നിലയിലായിരുന്നു.  

ഒന്നര മാസമായി ഇരുവരേയും കാണാനില്ല എന്ന് പരാതിയുണ്ടായിരുന്നു. ജോലി ചെയ്തിരുന്ന ഇലക്ട്രോണിക് സിറ്റിയിലുള്ള ഐടി കമ്പനിയിൽ കഴിഞ്ഞ ഒക്ടോബർ 11നാണ് ഇവർ അവസാനമായി എത്തിയത്. പ്രവർത്തി ദിവസമായ അന്ന് ഇരുവരും പുറത്തേക്ക് പോയിരുന്നു. പിന്നീട് ഇരുവരേയും കുറിച്ച് താതൊരു വിവരവും ആർക്കും ലഭിച്ചിരുന്നില്ല.

അതിനിടെ പെൺകുട്ടിയുടെ വീട്ടുകാർ പരപ്പന അ​ഗ്രഹാര പൊലീസിൽ പരാതി നൽകിയിരുന്നു. കഴിഞ്ഞ ഒന്നര മാസമായി അന്വേഷണം പുരോ​ഗമിക്കുകയായിരുന്നു. എന്നാൽ യാതൊരു വിവരവും ലഭിച്ചിരുന്നില്ല. കാണാതാവുന്നതിന്റെ തലേ ദിവസം യുവതി വീട്ടുകാരുമായി ഫോണിൽ സംസാരിച്ചിരുന്നുവെന്ന് പൊലീസ് പറയുന്നു. പിന്നീട് ഫോൺ സ്യുച്ച് ഓഫ് ചെയ്ത നിലയിലായിരുന്നു. ഇതിന് പിന്നാലെയാണ് ഇരുവരുടേയും മൃതദേഹം ജീർണിച്ച നിലയിൽ കണ്ടെത്തിയത്. അസ്വഭാവിക മരണത്തിന് കേസെടുത്ത് പൊലീസ് അന്വേഷണം ആരംഭിച്ചിട്ടുണ്ട്.