കൊച്ചി: റോക്കറ്റ് പോലെ കുതിച്ച് ഉയരുന്ന സവാള വിലയ്ക്ക് മുന്നിൽ ഒരു ബദൽ ബദൽ മാർഗവുമായി വ്യാപാരികൾ. ഉത്തരേന്ത്യൻ സംസ്ഥാനങ്ങളിൽ ഉപയോ​ഗത്തിലുണ്ടായിരുന്ന സംസ്കരിച്ച് ഉണക്കിയ സവാള ഇപ്പോൾ കേരളത്തിലെ വിപണിയിലും സാന്നിധ്യമറിയിക്കുകയാണ്. അരിഞ്ഞ് ഡ്രയറിൽ ഉണക്കിയെടുത്ത സവാള കിലോയ്ക്ക് 170 രൂപ നിരക്കിലാണ് വിൽപനയ്ക്കെത്തുന്നത്. 

സവാള വില കിലോ​ഗ്രാമിന് 120 രൂപ വരെയായതോടെയാണു മഹാരാഷ്ട്ര പോലുള്ള സംസ്ഥാനങ്ങളിൽ നിന്ന് ഉണക്ക സവാള കേരളത്തിലേക്കെത്തിയത്. മൂന്നു മണിക്കൂർ വെള്ളത്തിലിട്ടു കുതിർന്നുകഴിയുമ്പോൾ മൂന്നു കിലോ​ഗ്രാം പച്ച സവാളയുടെ പൊലിമയുണ്ടാകും ഇവയ്ക്കെന്നാണ് ഹോട്ടൽ ഉടമകൾ പറയുന്നത്. വെള്ളം വാർന്നശേഷം ഇവ അരച്ച് ഉപയോ​ഗിക്കാനാകും. 

120 മുതല്‍ മുകളിലോട്ടാണ് ചില്ലറ വില്‍പനശാലകളിലെ സവാള വില. ചെറിയ ഉള്ളിയുടെ വില 140 കടന്നു. വില കൂടുന്നതിനൊപ്പം സവാളക്ക് ക്ഷാമവും അനുഭവപ്പെട്ടുതുടങ്ങിയിട്ടുണ്ട്.