മുഖ്യമന്ത്രി പിണറായി വിജയന്‍ പെരിയോര്‍ രാമസ്വാമി നായ്ക്കരെപ്പോലെയാണെന്നും അദ്ദേഹത്തിനെപ്പോലുള്ള നേതാവിനെ കിട്ടാനാണ് തമിഴ്‌നാട്ടിലെ ജനങ്ങള്‍ ആഗ്രഹിക്കുന്നതെന്നും പ്രമുഖ മാധ്യമപ്രവര്‍ത്തകന്‍ നക്കീരന്‍ ഗോപാലന്‍. മീഡിയ മാഗസിന് നല്‍കിയ അഭിമുഖത്തിലായിരുന്നു നക്കീരന്‍ കേരള മുഖ്യമന്ത്രിയെ പ്രശംസിച്ചത്.
പിണറായി വിജയനോട് തമിഴ്മക്കള്‍ക്ക് ആദരവും സ്‌നേഹവുമുണ്ട്. ഇതുപോലൊരു നേതാവിനെ കിട്ടാനാണ് തമിഴ്‌നാട്ടുകാര്‍ ആഗ്രഹിക്കുന്നത് നക്കീരന്‍ വാരികയുടെ പത്രാധിപരായ നക്കീരന്‍ ഗോപാലന്‍ പറഞ്ഞു. മഹാപ്രളയത്തെ നേരിടുന്നതിലും ശബരിമല വിഷയം കൈകാര്യം ചെയ്യുന്നതിലും ഒരു ഭരണാധികാരി കാട്ടേണ്ട ധീരതയും സാമര്‍ഥ്യവും പിണറായിയില്‍ കണ്ടു എന്നാണ് അദ്ദേഹം പറയുന്നത്. തമിഴ് മക്കള്‍ ഈ മുഖ്യമന്ത്രിയില്‍ കാണുന്നത് പെരിയോര്‍ രാമസ്വാമി നായ്ക്കരെയാണ്. വൈക്കം സത്യാഗ്രഹത്തെ പിന്തുണച്ച് വൈക്കത്ത് എത്തിയ നവോത്ഥാന നായകനാണ് പെരിയോര്‍. അയിത്തത്തിനും അനാചാരത്തിനും എതിരായിരുന്നു പെരിയോര്‍.അമ്പലത്തിലെ പൂജാരിയായി ദളിതനെ കയറ്റണമെന്ന പെരിയോരുടെ സ്വപ്‌നം യാഥാര്‍ത്ഥ്യമാക്കിയ ഒരേയൊരു ഭരണാധികാരിയാണ് പിണറായി.
ശബരിമല സ്ത്രീ പ്രവേശന വിധിക്കെതിരേ സമരം നടത്തുന്നവരേയും അദ്ദേഹം രൂക്ഷമായ ഭാഷയില്‍ വിമര്‍ശിച്ചു. സ്ത്രീപ്രവേശനം തടയുന്നവര്‍ നാടിനെ പിന്നോട്ടടിക്കാന്‍ ശ്രമിക്കുന്നവരാണ് എന്നാണ് പിണറായി പറഞ്ഞത്. ഇതിനെതിരേ ഭരണചക്രം തിരിക്കാന്‍ നെഞ്ചുറപ്പ് കാട്ടുന്നതിലും പിണറായിയെ താന്‍ അഭിനന്ദിക്കുന്നവെന്നും അദ്ദേഹം കൂട്ടിച്ചേര്‍ത്തു.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ