തിരുവനന്തപുരം: ഹർത്താൽ ദിനത്തിൽ നെടുമങ്ങാട്ട് പ്രതിഷേധക്കാർ പൊലീസിനെ അക്രമിക്കുന്നതിന്റെ ദൃശ്യങ്ങൾ പുറത്ത്. നെടുമങ്ങാട് എസ്ഐ അടക്കം നാല് പൊലീസുകാരാണ് ആക്രമണത്തിന് ഇരകളായത്. പൊലീസ് വാഹനം വളഞ്ഞ് പ്രതിഷേധക്കാർ അക്രമിക്കുകയായിരുന്നു. 

ജീപ്പിന്റെ മുൻ വാതിൽ തുറന്ന് എസ്ഐയെ വലിച്ചിറക്കി മര്‍ദിക്കാന്‍ ശ്രമിക്കുന്നത് ദൃശ്യങ്ങളിലുണ്ട്. വടികളുമായി ഒരു സംഘം അക്രമിക്കാൻ ഒരുങ്ങുന്നതിനിടെ വാഹനം തിരിച്ചോടിച്ച് പൊലീസ് രക്ഷപെടുകയായിരുന്നു. സംഭവത്തിൽ എസ്ഐയുടെ കൈക്ക് പരുക്കേറ്റിരുന്നു. 

നെടുമങ്ങാട്ടെ അക്രമങ്ങളുമായി ബന്ധപ്പെട്ട് നേരത്തെ തന്നെ രണ്ട് പേർ പിടിയിലായിരുന്നു. ഇവർക്കൊപ്പമുള്ളവർ തന്നെയാണ് അക്രമിച്ചതെന്ന നി​ഗമനത്തിലാണ് പൊലീസ്. നെടുമങ്ങാട് പൊലീസ് സ്റ്റേഷന് നേരെ ബോംബെറിയുന്നതിന്റെ ദൃശ്യങ്ങൾ നേരത്തെ പുറത്ത് വന്നിരുന്നു. ഹർത്താൽ ദിനത്തിൽ പൊലീസ് സ്റ്റേഷന് നേരെ ബോംബേറ് നടന്നതിന് തൊട്ടുപിന്നാലെയാണ് പൊലീസുകാർ അക്രമിക്കപ്പെട്ടത്.