കോഴിക്കോട്: സംസ്ഥാനത്ത് മഴ കനത്തതോടെ ഫോൺ വിളികളും അപേക്ഷകളും കൊണ്ട് പൊറുതി മുട്ടിയിരിക്കുകയാണ് ജില്ലാ കളക്ടർമാർ. ദിവസവും നൂറുകണക്കിന് ഫോൺ വിളികളാണ് കളക്ടറേറ്റുകളിലേക്കും ഇൻഫർമേഷൻ ഓഫിസുകളിലേക്കുമെത്തുന്നത്. എല്ലാവർക്കും അറിയേണ്ടത് ഒരു കാര്യം മാത്രം. നാളെ അവധിയുണ്ടോ സർ ?

ജില്ല കളക്ടർമാരുടെ ഫെയ്സ്ബുക്ക് പേജിൽ മെസ്സേജുകളായും പോസ്റ്റുകൾക്ക് താഴെ കമന്‍റുകളായും ഈ ചോദ്യം നിറയുകയാണ് - നാളെ അവധിയുണ്ടോ ? ഇതിനൊപ്പം അവധി പ്രഖ്യാപിച്ചതായ വ്യാജ പ്രചാരണവും സജീവമായിട്ടുണ്ട്. ഇതോടെ പല ജില്ലകളിലെയും കളക്ടർമാർക്ക് 'നാളെ അവധി ഇല്ല' എന്ന് കാണിച്ച് പോസ്റ്റിടേണ്ടി വന്നു. 

അവധി സംബന്ധിച്ച് ഔദ്യോഗിക അറിയിപ്പുകൾ മാത്രമേ വിശ്വസിക്കാവൂ എന്നും കളക്ടർമാർ  മുന്നറിയിപ്പ് നൽകിയിട്ടുണ്ട്.