കൊല്ലം: പനിയെ തുടര്ന്ന് തലച്ചോറിലുണ്ടായ അണുബാധ കാരണം ചികിത്സയിലായിരുന്ന വിദ്യാര്ത്ഥിനി മരിച്ചു. കണ്ണനല്ലൂര് ചേരിക്കോണം രമ്യയില് പരേതനായ സനോജ് സോമരാജന്റെയും അശ്വതി സനോജിന്റെയും ഏകമകള് ആരുണി എസ് കുറുപ്പാണ് മരിച്ചത്. എഴുകോണ് ശ്രീ ശ്രീ അക്കാദമിയിലെ നാലാം ക്ലാസ് വിദ്യാര്ത്ഥിനിയായിരുന്നു ഈ ഒന്പതുവയസ്സുകാരി. ഒരു വര്ഷം മുന്പാണ് ആരുണിയുടെ അച്ഛന് സൗദിയില് വാഹനാപകടത്തില് മരിച്ചത്. ഭര്ത്താവിന്റെ വേര്പാടിന്റെ വേദന മാറും മുന്പാണ് പൊന്നുമോളെയും നഷ്ടപ്പെട്ടത്. ടിക് ടോക് വിഡിയോയിലൂടെ സുപരിചിതയാണ് ആരുണി.
കഴിഞ്ഞ ഞായറാഴ്ച ഉച്ചയോടെ പനിയും തലവേദനയുമായാണ് രോഗലക്ഷണം പ്രത്യക്ഷപ്പെട്ടത്. തിങ്കളാഴ്ച പുലര്ച്ചെ അസുഖം കൂടിയതോടെ ആരുണിയെ കൊട്ടിയത്തുള്ള സ്വകാര്യ ആശുപത്രിയില് പ്രവേശിപ്പിച്ചു. കുട്ടിയുടെ നില അതീവ ഗുരുതരമായതോടെ തിരുവനന്തപുരം എസ്എടി ആശുപത്രിയിലേയ്ക്ക് മാറ്റി. ചികിത്സയിലിരിക്കെ ബുധനാഴ്ച രാവിലെ എട്ടു മണിയോടെയായിരുന്നു മരണം.
രോഗകാരണം കണ്ടെത്താന് ആരോഗ്യവകുപ്പിന് സാധിച്ചിട്ടില്ല. കുട്ടിയുടെ തൊണ്ടയില് നിന്നുള്ള ശ്രവമെടുത്ത് ആലപ്പുഴ വൈറോളജി ഇന്സ്റ്റിറ്റിയൂട്ടിലേക്ക് പരിശോധനയ്ക്ക് അയച്ചു. പരിശോധന ഫലം ലഭിച്ചെങ്കില് മാത്രമെ മരണ കാരണം വ്യക്തമാകുകയുള്ളൂ. ഇതേ തുടര്ന്ന് തൃക്കോവില്വട്ടം പ്രാഥമികാരോഗ്യ കേന്ദ്രം പ്രദേശത്ത് അടിയന്തര മുന്കരുതല് നടപടികള് സ്വീകരിച്ചു.
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ