കോഴിക്കോട്: എഴുത്തുകാരനും പ്രകൃതി ചികിത്സകനുമായ പി എന്‍ ദാസ് അന്തരിച്ചു. 72 വയസ്സായിരുന്നു. കോഴിക്കോട് മെഡിക്കല്‍ കോളേജ് ആശുപത്രിയിലായിരുന്നു അന്ത്യം.
വൈദിക സാഹിത്യത്തിനുളള കേരള സാഹിത്യ അക്കാദമിയുടെ കെ ആര് നമ്പൂതിരി എന്‍ഡോവ്‌മെന്റ് പുരസ്‌കാരം നേടിയിട്ടുണ്ട്. ഒരു തുളളിവെളിച്ചം എന്ന കൃതിക്കായിരുന്നു പുരസ്‌കാരം.ബോധിവൃക്ഷത്തിന്റെ ഇലകള്‍, കരുണയിലേക്കുളള തീര്‍ഥാടനം, ബുദ്ധന്‍ കത്തിയെരിയുന്നു, പക്ഷിമാനസം, ജീവിത പുസ്തകത്തില്‍ നിന്ന്, വേരുകളും ചിറകുകളും തുടങ്ങി നിരവധി കൃതികളുടെ രചയിതാവാണ്.
പട്ടാമ്പി സംസ്‌കൃത കോളേജിലായിരുന്നു ഉപരിപഠനം. കോളേജില്‍ പഠിച്ചിരുന്നപ്പോള്‍ തന്നെ കൈയ്യെഴുത്തു മാസികകളിലും ലിറ്റില്‍ മാസികകളിലും എഴുതിയിരുന്നു. 'ദീപാങ്കുരന്‍' എന്ന തൂലികാ നാമത്തിലുമെഴുതിയിരുന്നു. അടിയന്തരാവസ്ഥ കാലത്ത് തടവു ശിക്ഷ അനുഭവിച്ചിട്ടുണ്ട്.
ജയിലില്‍നിന്നും ഇറങ്ങിയ ശേഷം വൈദ്യശാസ്ത്രം എന്ന പേരില്‍ ഒരു മാസിക കോഴിക്കോട് നിന്നുമാരംഭിച്ചു. അതിലും 'ദീപാങ്കുരന്‍' എന്ന പേരിലാണ് എഡിറ്റോറിയലുകള്‍ എഴുതിയിരുന്നത്.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ