തിരുവനന്തപുരം : കേരളത്തില്‍ കോണ്‍ഗ്രസിന്റെ കൗണ്ട് ഡൗണ്‍ തുടങ്ങിയെന്ന് ബിജെപി സംസ്ഥാന പ്രസിഡന്റ് പി എസ് ശ്രീധരന്‍ പിള്ള. കോണ്‍ഗ്രസ് മുന്‍ വക്താവായിരുന്ന ടോം വടക്കന്റെ ബിജെപി പ്രവേശനം ഇതിന്റെ തുടക്കമായി മാത്രം കണ്ടാല്‍ മതിയെന്നും ശ്രീധരന്‍പിള്ള പറഞ്ഞു.
നേരത്തെ രാമന്‍ നായര്‍ അടക്കം ഏതാനും പ്രമുഖ കോണ്‍ഗ്രസ് നേതാക്കള്‍ ബിജെപിയില്‍ ചേര്‍ന്നിരുന്നു. എന്നാല്‍ ഇത് വലിയ വാര്‍ത്തയായിരുന്നില്ല. ഒരാഴ്ചയ്ക്കകം കൂടുതല്‍ പ്രമുഖ നേതാക്കള്‍ ബിജെപിയില്‍ വരാന്‍ താല്‍പ്പര്യം പ്രകടിപ്പിച്ചിട്ടുണ്ട്. എന്നാല്‍ ഇവരുടെ പേരുവിവരങ്ങള്‍ വെളിപ്പെടുത്താന്‍ ഇപ്പോള്‍ പറ്റില്ല.
ബിജെപിയില്‍ ചേര്‍ന്ന ടോം വടക്കന് കേരളത്തില്‍ സ്ഥാനാര്‍ത്ഥിയാക്കുമോ എന്ന മാധ്യമപ്രവര്‍ത്തകരുടെ ചോദ്യത്തിന് ശ്രീധരന്‍പിള്ള വ്യക്തമായ മറുപടി പറഞ്ഞില്ല. അതേസമയം മറ്റു പാര്‍ട്ടിയില്‍ നിന്നും വരുന്ന നേതാക്കളെ അര്‍ഹിക്കുന്ന രീതിയില്‍ അക്കോമഡേറ്റ് ചെയ്യാന്‍ പാര്‍ട്ടി ദേശീയ നേതൃത്വം നിര്‍ദേശം നല്‍കിയിട്ടുണ്ടെന്ന് ശ്രീധരന്‍പിള്ള വ്യക്തമാക്കി. ബിജെപിയില്‍ ടോം വടക്കന് അര്‍ഹമായ പരിഗണന നല്‍കുമെന്നും ശ്രീധരന്‍പിള്ള പറഞ്ഞു.
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ