കല്‍പ്പറ്റ:സിപിഎം വയനാട് ജില്ലാ കമ്മിറ്റിയംഗവും  മുന്‍ ജില്ലാ സെക്രട്ടറിയുമായ എം വേലായുധന്‍ അന്തരിച്ചു. 71 വയസ്സായിരുന്നു. ബുധനാഴ്ച വൈകിട്ട് വൈത്തിരിയിലെ ഗുഡ് ഷെപ്പേര്‍ഡ് ആശുപത്രിയിലായിരുന്നു അന്ത്യം.  2016 ആഗസ്തില്‍ ജില്ലാ സെക്രട്ടറിയായ വേലായുധന്‍ കഴിഞ്ഞ സമ്മേളനകാലംവരെ തുടര്‍ന്നു. രോഗബാധിതനായതിനെ തുടര്‍ന്ന് സെക്രട്ടറിയുടെ ചുമതല ഒഴിയുകയായിരുന്നു. വയനാട്ടില്‍ കമ്യൂണിസ്റ്റ് പാര്‍ടി കെട്ടിപ്പടുക്കുന്നതില്‍ മുന്‍നിരയില്‍നിന്ന് പ്രവര്‍ത്തിച്ചവരില്‍ ഒരാളാണ്.

ദീര്‍ഘകാലം കര്‍ഷകസംഘത്തിന്റെ ജില്ലാ സെക്രട്ടറിയും സംസ്ഥാന കമ്മിറ്റിയംഗവുമായിരുന്നു. കര്‍ഷകരെയും കര്‍ഷകത്തൊഴിലാളികളെയും ആദിവാസികളെയും സംഘടിപ്പിച്ചാണ് പൊതുരംഗത്തേക്ക് വന്നത്. 1967ല്‍ പാര്‍ടി അംഗമായി. സിപിഎം  കോട്ടത്തറ ബ്രാഞ്ച് സെക്രട്ടറി, ലോക്കല്‍ സെക്രട്ടറി, കല്‍പ്പറ്റ ഏരിയാ സെക്രട്ടറി  തുടങ്ങിയ സ്ഥാനങ്ങള്‍ വഹിച്ചു.  1995 മുതല്‍ ജില്ലാ കമ്മിറ്റിയംഗമായി. പിന്നീട് സെക്രട്ടറിയറ്റ് അംഗമായി.

സിപിഎം ജില്ലാ കമ്മിറ്റി ഓഫീസായ കല്‍പ്പറ്റ എകെജി ഭവനില്‍ പൊതുദര്‍ശനത്തിനുവച്ച മൃതദേഹം വ്യാഴാഴ്ച പകല്‍ 12ന് കോട്ടത്തറയിലെ നായനാര്‍ സ്മാരക ഹാളിലേക്ക് കൊണ്ടുപോകും. അവിടെ പൊതുദര്‍ശനത്തിനുശേഷം മൂന്നോടെ  വീട്ടുവളപ്പില്‍ സംസ്‌കരിക്കും. ഭാര്യ: യശോദ. മക്കള്‍: ആശ, അജിത്പാല്‍.  മരുമക്കള്‍: ബിനു, ശ്രീജ.