മലപ്പുറം; കാഴ്ചയില്ലാത്ത വില്‍പ്പനക്കാരനെ സഹായിക്കാനായി ലോട്ടറി ടിക്കറ്റ് എടുത്ത യുവാവിന് 80 ലക്ഷം രൂപ സമ്മാനം. മലപ്പുറം തുവ്വൂര്‍ കിളിക്കുന്ന് അറനിക്കല്‍ ജിഷ്ണുവിനാണ് (28) ഭാഗ്യം കനിഞ്ഞത്. ലോട്ടറി ഏജന്റ് ചെമ്പ്രശേരി സ്വദേശി സുരേഷ് ബാബുവിന് സഹായകമാകട്ടെയെന്നു കരുതിയാണ്  ജിഷ്ണു ലോട്ടറി എടുത്തത്.

സുരേഷ് ബാബുവിനോട് തോന്നിയ കാരുണ്യത്തിന് പ്രതിഫലമായാണ് കാരുണ്യ പ്ലസ് ഭാഗ്യക്കുറിയിലൂടെ ഒന്നാം സമ്മാനമായ 80 ലക്ഷം രൂപ ലഭിച്ചത്. താളിയംകുണ്ടിലെ റബര്‍ കടയില്‍ ജീവനക്കാരനായ ജിഷ്ണു വല്ലപ്പോഴുമാണ് ടിക്കറ്റ് എടുക്കുന്നത്. സമ്മാനാര്‍ഹമായ ടിക്കറ്റ് തുവ്വൂര്‍ റൂറല്‍ സഹകരണ സംഘത്തില്‍ എല്‍പിച്ചു.