എറണാകുളം: ആശുപത്രിയിലേക്കു പോകുന്നതിനിടയിൽ ​യുവതി ഓട്ടോയിൽ പ്രസവിച്ചു. പോങ്ങൻചുവട് ആദിവാസി കോളനിയിലെ സതീഷിന്റെ ഭാര്യ മാളുവാണ് ആശുപത്രിയിലേക്കുള്ള വഴിമദ്ധ്യേ കുഞ്ഞിന് ജന്മം നൽകിയത്. ഇന്നലെ രാവിലെ ഒൻപതരയോടെയായിരുന്നു സംഭവം. അമ്മയും കുഞ്ഞും സുഖമായിരിക്കുന്നു.

വിവരം അറിയിച്ചതിനെത്തുടർന്ന് വടാട്ടുപാറയിലെ മെഡിക്കൽ ക്യാംപിൽ നിന്ന് നഴ്സുമാർ എത്തി പ്രഥമശുശ്രൂഷ നൽകി. പിന്നീട് മാളുവിനെയും കുഞ്ഞിനെയും ആംബുലൻസിൽ താലൂക്ക് ആശുപത്രിയിൽ പ്രവേശിപ്പിച്ചു. അമ്മ ശാന്തയും ഭർത്താവ് സതീഷും സഹോദരിയും ഒപ്പമുണ്ടായിരുന്നു. കഴിഞ്ഞ ആഴ്ച താലൂക്ക് ആശുപത്രിയിൽ ചികിത്സ തേടിയപ്പോൾ രണ്ടു ദിവസം കഴിഞ്ഞ് ആശുപത്രിയിൽ എത്തണമെന്നു പറഞ്ഞിരുന്നെങ്കിലും ഇവർ എത്തിയില്ല.  

ഇടമലയാറിൽ നിന്നു പോങ്ങൻചുവട് കോളനിയിലേക്കു പോകുന്ന ഏഴ് കിലോമീറ്റർ വനപാതയിലുള്ള വൈശാലി ഗുഹയിൽ വച്ചാണ് മാളു പ്രസവിച്ചത്. രാത്രികാലങ്ങളിൽ ഈ മേഖലയിൽ കാട്ടാനകൾ പതിവാണ്.