കോട്ടയം: വൈക്കം ചേരുംചുവടിൽ സ്വകാര്യ ബസ് കാറിലേക്ക് പാഞ്ഞു കയറി നാല് പേർ മരിച്ചു. ഉദയംപേരൂർ സ്വദേശികളായ മനക്കപ്പറമ്പിൽ വിശ്വനാഥൻ, സൂരജ്, ​ഗിരിജ, അജിത എന്നിവരാണ് മരിച്ചത്. ഇന്ന് രാവിലെ  5.45ഓടെയാണ് അപകടമുണ്ടായത്.

എറണാകുളം വൈക്കം റൂട്ടിലോടുന്ന സ്വകാര്യ ബസാണ് ചേരുംചുവട് പാലം കയറി ഇറങ്ങി വരികയായിരുന്ന കാറിനെ ഇടിച്ചത്. ഇടറോഡിൽ നിന്ന് പ്രധാന റോഡിലേക്ക് കാർ കയറി വരുമ്പോൾ ബസ് പാഞ്ഞു മുകളിൽ കയറിയാണ് അപകടമുണ്ടായത്. തൊട്ടപ്പുറത്തുള്ള മതിലും തകർത്താണ് ബസ് നിന്നത്.

അപകടത്തിൽ കാർ പൂർണമായും തകർന്നു. കാറിലുണ്ടായിരുന്ന നാല് പേരും സംഭവ സ്ഥലത്ത് തന്നെ മരിച്ചു. നാട്ടുകാർ ചേർന്നാണ് തകർന്ന കാറിൽ നിന്ന് നാല് പേരെയും പുറത്തെടുത്തത്. ബസിലുണ്ടായിരുന്ന പത്ത് പേർക്ക് പരുക്കേറ്റിട്ടുണ്ട്.

ബസിന്റെ അമിത വേ​ഗതയാണ് അപകട കാരണമെന്ന് ദൃക്സാക്ഷികൾ പറഞ്ഞു. സംഭവ സ്ഥലത്തെ സിസിടിവി ദൃശ്യങ്ങൾ പൊലീസ് പരിശോധിക്കും.