പത്തനംതിട്ട: പാമ്പുകൾക്കിടയിലെ രാജാവെന്ന് അറിയപ്പെടുന്ന രാജവെമ്പാലയെ വീണ്ടും വാവ സുരേഷ് പിടികൂടുന്നതിന്റെ ദൃശ്യങ്ങൾ പുറത്ത്. 175-ാമത്തെ രാജവെമ്പാലയെ വാവ സുരേഷ് പിടികൂടുന്ന ദൃശ്യങ്ങളാണ് സോഷ്യൽമീഡിയയിൽ വ്യാപകമായി പ്രചരിക്കുന്നത്.

പത്തനംതിട്ട ജില്ലയിലെ കോന്നി ഫോറസ്റ്റ് ഡിവിഷൻ പരിധിയിൽ വരുന്ന ഹാരിസൺ മലയാളം ലിമിറ്റഡ് എസ്റ്റേറ്റിന്റെ ‍ഡിസ്പൻസറിയിൽ നിന്നാണ് രാജവെമ്പാലയെ പിടികൂടിയത്. ജനുവരി 5നാണ്  രാജവെമ്പാലയെ കണ്ടെന്ന ഫോൺ സന്ദേശമെത്തിയത്. ഇവിടെയെത്തിയ വാവ സുരേഷ് വരാന്തയിൽ ചാരി വച്ചിരുന്ന ബോർഡിന്റെ പിന്നിൽ നിന്നാണ് പതുങ്ങിയിരുന്ന രാജവെമ്പാലയെ പിടികൂടിയത്. 

ഇന്ത്യയിൽ തന്നെ ഏറ്റവും കൂടുതൽ രാജവെമ്പാലയെ പിടികൂടിയതിന്റെ സന്തോഷവും ഇദ്ദേഹം വിഡിയോയിലൂടെ വ്യക്തമാക്കി.
12 അടിയിലേറെ നീളമുണ്ടായിരുന്നു പെൺ രാജവെമ്പാലയ്ക്ക്. പിടികൂടിയ രാജവെമ്പാലയെ പിന്നീട് വനത്തിൽ കൊണ്ടുപോയി തുറന്നുവിട്ടു.